Kartof püresinin daha yumşaq, qaymaqlı və ləzzətli alınması üçün onu suda deyil, süddə bişirmək tövsiyə olunur. Peşəkar aşpazın sözlərinə görə, bu üsul yeməyin həm dadını, həm də konsistensiyasını yaxşılaşdırır.
Demokrat.az xəbər verir ki, bu barədə "The Mirror" yazıb.
Təcrübəli aşpaz Rozmari Hill bildirib ki, kartof püresi hazırlayarkən ən çox yol verilən səhvlərdən biri tərəvəzi suda qaynatmaqdır. Onun sözlərinə görə, kartof bişərkən tərkibindəki nişastanın bir hissəsi suya keçir və həmin su adətən süzülərək atılır.
Kartof süddə bişirildikdə isə nişastanın daha çox hissəsi yeməyin tərkibində qalır. Bundan əlavə, tərəvəz südün dadını özünə çəkir və nəticədə püreyə daha zəngin, qaymaqlı dad verir. Bu üsul hazır yeməyin sulu olmasının da qarşısını alır.
Aşpazın diqqət çəkdiyi digər məqam isə temperatur fərqidir. Kartof süddə bişirildikdən sonra əlavə edilən süd də eyni temperaturda olduğundan qarışım daha hamar alınır. Beləliklə, püredə topaların yaranma ehtimalı azalır.
Südlə kartof püresi necə hazırlanır?
Əvvəlcə kartof yuyulur, iri hissələrə doğranaraq qalın dibli qazana yerləşdirilir. Üzərinə kartofu örtəcək qədər süd əlavə olunur və təxminən 20 dəqiqə, tam yumşalana qədər bişirilir.
Daha sonra kartof əzici ilə püre halına salınır, duz və kərə yağı əlavə edilərək qarışdırılır.
Bişirmə zamanı südün daşmasından narahat olanlar qazanın kənarlarını əvvəlcədən kərə yağı ilə yağlaya bilərlər. Bu sadə üsul sayəsində daha zərif teksturalı və kremli kartof püresi hazırlamaq mümkündür.
