Balığı pulcuqlardan təmizləmək mətbəxdə ən çox vaxt aparan və ətrafı çirkləndirən işlərdən biridir. Lakin aşpaz Anxel Leon bu prosesi asanlaşdıran maraqlı üsul açıqlayıb. Bunun üçün xüsusi alətə deyil, demək olar ki, hər evdə olan adi sürtgəcə ehtiyac var.
Demokrat.az xəbər verir ki, bu barədə "Cronica Global" portalı məlumat yayıb.
Aşpazın sözlərinə görə, bu üsulu həmkarlarından deyil, dəniz səyahəti zamanı tanış olduğu bir dənizçidən öyrənib. Metodun əsas üstünlüyü balığın pulcuqlarını tez təmizləməklə yanaşı, onların mətbəxin hər tərəfinə səpələnməsinin də qarşısını almaqdır.
Sürtgəcin hansı tərəfi istifadə edilməlidir?
Bunun üçün sürtgəcin iri dəlikləri olan, ən kobud tərəfini seçmək lazımdır. Balığın dərisi üzərində pulcuqların çıxma istiqamətinin əksinə, yəni quyruqdan başa doğru hərəkət etdirməklə onları asanlıqla təmizləmək mümkündür.
Üsul necə tətbiq olunur?
Əvvəlcə balığı doğrama taxtasının üzərinə, yaxşı olar ki, mətbəx çanağının yaxınlığına yerləşdirmək lazımdır. Daha sonra iri dəlikli sürtgəc götürülərək quyruqdan başa doğru bərabər təzyiqlə hərəkət etdirilir.
Eyni prosedur balığın hər iki tərəfinə tətbiq olunmalıdır. Dəridə pulcuqların qalmadığına əmin olduqdan sonra balığı soyuq su ilə yaxalamaq olar.
Nəticədə balıq əlavə xüsusi avadanlıqdan istifadə etmədən pulcuqlardan təmizlənir və bişirilməyə hazır vəziyyətə gətirilir.
Aşpazın tövsiyə etdiyi bu üsul xüsusilə ev şəraitində tez-tez balıq hazırlayanlar üçün praktik alternativ hesab olunur.
