YapiKredi Müraciət Forması
Mazda CX-5
Maraqlı Özəl

Epşteynin ölümü ilə bağlı yeni iddia: Ekspert onun boğularaq öldürüldüyünü deyir

Epşteynin ölümü ilə bağlı yeni iddia: Ekspert onun boğularaq öldürüldüyünü deyir

Maliyyəçi Ceffri Epşteynin 2019-cu ildə həbsxana kamerasında ölümü ilə bağlı yeni iddia ortaya atılıb. Məhkəmə-tibb eksperti Maykl Frimen onun intihar etmədiyini, boğularaq öldürüldüyünü düşünür.

Demokrat.az xəbər verir ki, bu barədə amerikalı ekspert BBC-yə müsahibəsində danışıb.

Frimen bildirib ki, Epşteynin qardaşı Markın təqdim etdiyi autopsiya hesabatını və meyitin fotolarını təxminən bir il ərzində araşdırıb. Təhlillərdən sonra o, ölümün intihar deyil, qətl nəticəsində baş verdiyi qənaətinə gəlib.

Ekspertin sözlərinə görə, Epşteynin boynunda aşkarlanan izlər özünü asma zamanı yaranan xəsarətlərə uyğun deyil. O, boyun nahiyəsində dərin və qeyri-bərabər izlərlə yanaşı, sol çiyində ciddi qansızma və sifətdə zərbə nəticəsində yarana biləcək xəsarətlər olduğunu iddia edib.

Frimenin ehtimalına əsasən, maliyyəçi arxadan kəndirə bənzər əşya ilə boğulub, daha sonra isə həmin vasitədən istifadə edilməklə meyiti ikimərtəbəli çarpayıdan asılıb. Ekspert boyundakı dırnaq izlərinin də qurbanın boğulma zamanı xilas olmağa çalışması ilə əlaqəli ola biləcəyini bildirib.

O, xəsarətlərin xarakterinin meyitin tapıldığı vəziyyətlə uyğunlaşmadığını vurğulayaraq, qətl versiyasını irəli sürüb.

Lakin bu iddia rəsmi araşdırmanın nəticələri ilə üst-üstə düşmür. Belə ki, 2019-cu ildə Epşteynin meyitinin yarılmasını aparan məhkəmə-tibb eksperti ölümün intihar olduğunu bildirmişdi. Həmin ekspert aşkarlanan xəsarətlərin özünü asma halına uyğun gəldiyini, qətl ehtimalını təsdiqləyən müqavimət izlərinin müəyyən edilmədiyini açıqlamışdı.

Qeyd edək ki, azyaşlı qızların cinsi istismarı və bu məqsədlə şəbəkə yaratmaqda ittiham olunan Ceffri Epşteyn 10 avqust 2019-cu ildə Nyu-Yorkdakı Metropolitan İslah Mərkəzindəki kamerasında ölü tapılıb.

Onun işi ABŞ-də uzun müddət geniş ictimai müzakirələrə səbəb olub. İctimaiyyətə açıqlanan sənədlərdə bir sıra tanınmış siyasətçilərin, iş adamlarının və məşhurların adları yer alıb. Bununla belə, sənədlərdə hər hansı şəxsin adının çəkilməsi onun cinayətdə iştirakını sübut etmir.

ABŞ Federal Təhqiqatlar Bürosu və Ədliyyə Nazirliyi birgə araşdırmanın nəticələrinə əsasən, Epşteynin nüfuzlu şəxslərdən ibarət olduğu iddia edilən müştəri siyahısının mövcudluğunu təsdiqləyən sübut tapılmadığını açıqlayıb. Rəsmi qurumlar həmçinin onun ölümünün intihar olduğu qənaətinə gəliblər.

Beləliklə, Maykl Frimenin açıqlaması Epşteynin ölümü ətrafında illərdir davam edən mübahisələrə yeni müzakirə mövzusu əlavə etsə də, qətl iddiası hələlik rəsmi araşdırmanın nəticələri ilə təsdiqlənməyib.