Toyuq, xüsusilə pəhriz saxlayan və ya idman qidalanmasına üstünlük verən insanlar üçün ən yaxşı zülal mənbələrindən biri hesab olunur. Lakin eyni məhsulun qida dəyəri onun hansı hissəsindən istifadə edilməsindən asılı olaraq əhəmiyyətli dərəcədə dəyişə bilər. Xüsusilə də tez-tez belə bir sual yaranır: zülal daha çox toyuq sinəsindədir, yoxsa bud ətində?
Demokart.az xəbər verir ki, bu barədə diyetoloqlar “Real Simple” portalına danışıb.
Toyuq sinəsi, yoxsa bud əti daha yaxşıdır?
Yalnız zülal və yağ miqdarını nəzərə alsaq, “Advances in Nutrition” jurnalında dərc olunan araşdırmalara əsasən, üstünlük sinə ətinə verilir. 100 qram dərisiz toyuq filesində təxminən 131 kilokalori, 25,6 qram zülal və cəmi 2,2 qram yağ var.
Bu səbəbdən sinə əti xüsusilə qida rasionunun kaloriliyinə nəzarət edən və ya əzələ kütləsini artırmağa çalışan insanlar üçün uyğundur. Bununla belə, sinə ətində yağın çox az olması onun dadının daha neytral olmasına səbəb olur və bişirilərkən ocaqda həddindən artıq saxlanılarsa, tez quruya bilər.
Bud ətində isə ABŞ Kənd Təsərrüfatı Nazirliyinin (USDA) məlumatlarına görə göstəricilər fərqlidir. 100 qram dərisiz bud ətində təxminən 164 kilokalori, 21,2 qram zülal və 9 qram yağ olur. Məhz yağ miqdarındakı bu, ilk baxışda kiçik görünən fərq bud ətini daha şirəli və zəngin dadlı edir. Buna görə də bişirmə zamanı onun qurudulması daha çətindir.
Bununla belə, bud ətini daha az qidalı hesab etmək olmaz. Sinə əti ilə müqayisədə onun tərkibində daha çox dəmir və sink var. Dərisi çıxarıldıqda isə yağ və kalori miqdarı da azalır.
Toyuğun ən faydalı hissəsi hansıdır?
Əslində yalnız bir variant seçmək məcburi deyil. Sinə əti yüngül yeməklər və zülalla zəngin qidalanma üçün, bud əti isə daha şirəli və ətirli ət istədikdə uyğun seçimdir.
Bundan əlavə, çox şey bişirmə üsulundan asılıdır. Çox miqdarda yağ əlavə etmədən sobada bişirmək, pörtlətmək və ya qrildə hazırlamaq hər iki variantda ümumilikdə qəbul edilən kalori miqdarını qorumağa imkan verir. Yağda qızartmaq isə əksinə, yeməyi əhəmiyyətli dərəcədə daha yağlı edir.
Beləliklə, USDA məlumatlarına əsasən, toyuq filesini bir qədər daha faydalı seçim hesab etmək olar. Lakin fərq bud ətindən tamamilə imtina etmək üçün o qədər böyük deyil. Xüsusilə də bud əti əlavə yağ və dəri olmadan hazırlandıqda sağlam qidalanmanın bir hissəsi ola bilər.
Toyuq sinəsində, yoxsa bud ətində daha çox zülal olduğunu bilməklə, arıqlamaq prosesini daha səmərəli təşkil etmək və idman formasını qorumaq mümkündür.
Jalə Demokrat.az
