Kalium ürəyin, əzələlərin, beynin və böyrəklərin normal fəaliyyəti üçün vacib minerallardan biridir. Orta ölçülü bir bananda təxminən 422 milliqram kalium olsa da, bu mineralla zəngin yeganə məhsul banan deyil.
Demokrat.az xəbər verir ki, "Verywell Health" kalium baxımından zəngin olan bir sıra meyvə və tərəvəzlərin siyahısını təqdim edib.
Avokado
Avokado faydalı yağlarla yanaşı, kaliumun da zəngin mənbəyidir. Orta ölçülü bir avokado əksər böyüklər üçün gündəlik kalium ehtiyacının təxminən üçdəbirini təmin edir. Bundan əlavə, maqnezium, fol turşusu və liflə zəngindir.
Manqold
Manqold banandan daha çox kalium ehtiva edir. O, həmçinin antioksidantlar, dəmir, sink və maqneziumla zəngindir. Bu maddələr bəzi xroniki xəstəliklərin inkişaf riskini azaltmağa kömək edə bilər.
Bişmiş kartof
Qabığı ilə birlikdə bişirilmiş kartof karbohidratlarla zəngin olduğundan orqanizmi enerji ilə təmin edir. O, həm də maqnezium, fosfor və kaliumun yaxşı mənbəyi hesab olunur.
Palıd balqabağı ("Acorn squash")
Bu nişastalı balqabaq növü yüksək karbohidrat tərkibinə görə bəzən tənqid olunsa da, kaliumla yanaşı C vitamini, lif, antioksidantlar və beta-karotin baxımından da zəngindir.
Batat
Şirin kartof kimi tanınan batat lif, A və C vitaminləri, sink və kalium ehtiva edir. Tərkibindəki beta-karotin göz və dəri sağlamlığını dəstəkləyir.
Qaysı qurusu
Qurudulmuş meyvələr təzə meyvələrlə müqayisədə daha çox şəkər və kalori ehtiva etsə də, qaysı qurusu əksər böyüklər üçün gündəlik kalium ehtiyacının təxminən 25 faizini təmin edir.
Quava
Quava yüksək C vitamini tərkibi ilə yanaşı, kaliumun da zəngin mənbəyidir. O, həmçinin antioksidantlar ehtiva edir və hipertoniya, diabet kimi xroniki xəstəliklərin qarşısının alınmasına kömək edə bilər.
Gavalı qurusu
Gavalı qurusu lif sayəsində həzmin yaxşılaşmasına kömək edir. Bundan başqa, kalium, K vitamini və antioksidantlarla da zəngindir.
Balqabaq
Balqabaq əsasən payız məhsulu hesab olunsa da, ilboyu istifadə edilə bilər. Balqabaq püresi qarnir, şorba, makaron və ya piroqlara əlavə edilərək kalium, A və E vitaminlərinin qəbulunu artırmağa kömək edir.
Gündəlik kalium ehtiyacı
Mütəxəssislərin sözlərinə görə, gündəlik kalium ehtiyacı yaşdan və cinsdən asılı olaraq dəyişir.
Yetkin kişilər üçün: 3 400 milliqram. Yetkin qadınlar üçün: 2 600 milliqram. Süd verən qadınlar üçün: təxminən 2 800 milliqram.
Jalə Demokrat.az
