Bəzi şizofreniya halları psixiatriyadan kənar, birbaşa orqanizmin immun sistemi ilə bağlı ola bilər. Rusiya Elmlər Akademiyasının müxbir üzvü Vsevolod Belousov bu sahədə aparılan araşdırmaların tibbi yanaşmanı kökündən dəyişə biləcəyini bildirib.
Demokrat.az-ın məlumatına görə Vsevolod Belousov qeyd edib ki, bəzən standart psixiatrik müalicələr nəticə vermir, çünki xəstəliyin kökündə beyin funksiyalarının pozulması deyil, immun sisteminin neyronlara hücumu dayanır.
Tibb elmində "autoimmun şizofreniya" kimi tanınan bu hal olduqca maraqlı mexanizmə malikdir. İmmun sistemi yanlışlıqla beyindəki müəyyən reseptorları hədəf alır. Xüsusilə NMDA-reseptorlarına qarşı yaranan anticisimlər beyin siqnallarının ötürülməsini pozur. Eyni mexanizm bəzi autoimmun koma hallarında da müşahidə olunur. Həkimlərin müşahidələrinə görə, immun reaksiyanı dərmanlar vasitəsilə zəiflətmək bəzi pasiyentlərdə gözlənilməz və qəfil yaxşılaşmaya səbəb olur.
Bu sahənin mürəkkəbliyi psixi xəstəliklərə fərqli prizmadan baxmağı tələb edir. İmmun mexanizmlərin psixi sağlamlıqla əlaqəsini aşkar etmək gələcəkdə müalicə protokollarının daha effektiv və fərdiləşdirilmiş formada qurulmasına şərait yaradır. Alim hesab edir ki, bu kəşflər ənənəvi üsullarla müalicəsi mümkün olmayan bir çox pasiyent üçün yeni ümid işığı ola bilər.
İsmayıl Demokrat.az
