Rusiyanın Kiyevə hücumu nəticəsində Hollandiya və Avstriya səfirliklərinə ziyan dəyib
Demokrat.az-ın Bloomberg-ə istinadən verdiyi məlumata görə, hər iki ölkənin hökumətləri heç kimin xəsarət almadığını bildirib. Avstriyanın xarici işlər naziri Beate Meinl-Reisinger əlavə edib ki, Ukrayna paytaxtına edilən hücumların intensivləşməsi fonunda əlavə təhlükəsizlik tədbirlərinin görülməsi barədə göstəriş verib. NATO üzvü olan digər Avropa Birliyi ölkələrinin əksəriyyətindən fərqli olaraq, Avstriya hərbi neytrallıq siyasətini davam etdirir.
Öz növbəsində, Niderlandın xarici işlər naziri Tom Berendsen aydınlıq gətirdi ki, diplomatik missiyanın arxasında yerləşən binaya mərmi düşüb, nəticədə missiyanın özünə cüzi ziyan dəyib. Nazirlik izahat tələb etmək üçün Rusiya səfirini çağırıb.
Noyabrın 17-də Niderlandın müdafiə şirkəti "Destinus" Ukraynanın Krım körpüsünə zərbə endirmək üçün onun istehsalı olan "Ruta" qanadlı raketlərindən istifadə etdiyini açıqladı. İlk hücum nəticəsində körpünün yuxarı yükdaşıyan konstruksiyası zədələnib, ikinci hücumda isə körpü aşırımlarından biri uçub. Rusiya hava hücumundan müdafiə sistemlərini susdurmaq üçün Ukrayna hərbçiləri yenə də "Destinus" tərəfindən istehsal olunan "LORD/Da Vinci" sistemlərini tətbiq ediblər.
Bunun ardınca Rusiyanın səfirliyi bəyan edib ki, Moskvanın Niderlanda Ukraynadakı müharibədə "neytral müşahidəçi" kimi baxması "getdikcə çətinləşir", çünki "Haaqa öz hərəkətləri ilə münaqişədə iştirakını daim dərinləşdirir, bununla da müharibənin uzanmasına və daha da gərginləşməsinə töhfə verir".
Ukraynanın xarici işlər naziri Andrii Sibiha həmçinin bildirib ki, cümə axşamı Kiyevə edilən hücum zamanı Rusiya pilotsuz uçuş aparatının qalıqları Braziliya səfirliyinin ərazisinə düşüb. Onun sözlərinə görə, binaya heç bir ziyan dəyməyib, xəsarət alan olmayıb.
Dövlət Fövqəladə Hallar Xidmətinin məlumatına görə, həmin gün Rusiya tərəfindən Ukrayna paytaxtına endirilən zərbələr nəticəsində ümumilikdə bir nəfər həlak olub, dörd nəfər isə yaralanıb. Yaşayış və qeyri-yaşayış binalarına, eləcə də yanğın-xilasetmə bölməsinə ziyan dəyib. Yanan altı mərtəbəli binadan iki nəfər, o cümlədən bir yeniyetmə xilas edilib. Bundan əlavə, düşən qalıqlar Müqəddəs Vladimir Katedralinin pəncərələrinə və bir neçə nəqliyyat vasitəsinə ziyan vurub.
Qeyd edək ki, Ukraynanın digər bölgələrində də həlak olanlar və xəsarət alanlar var. Kiyev vilayətində pilotsuz uçuş aparatı ilə endirilən zərbə nəticəsində 44 yaşlı qadın həlak olub, Zaporojye vilayətində isə Kuşuhum qəsəbəsinin bir sakini həyatını itirib. Xarkov vilayətinin İzyum şəhərində yaşayış binasına endirilən zərbə nəticəsində dördü uşaq olmaqla 21 nəfər xəsarət alıb; Xarkov şəhərində isə ikisi yeniyetmə olmaqla yeddi nəfər yaralanıb. Dnepropetrovsk vilayətinin Nikopol rayonu atəşə tutulub, nəticədə bir nəfər həlak olub.



