Mövsüm dəyişikliyi ilə əlaqədar havaların soyuması, günəş işığının azalması və gündəlik həyat tərzində baş verən dəyişikliklər sağlamlığa təsir edə bilər. Payız və qış aylarında respirator infeksiyaların yayılması da orqanizmin müdafiə sisteminə diqqət yetirməyi zəruri edir.
İmmunitetin normal fəaliyyətini qorumaq üçün ilk növbədə qidalanma və gündəlik rejim düzgün təşkil olunmalıdır. Bəzi vitamin və mineralların kifayət qədər qəbul edilməsi, eləcə də sağlam vərdişlərə əməl olunması bu baxımdan əhəmiyyətlidir.
Meyvə və tərəvəzləri süfrənizdən əskik etməyin
C vitamini immun sisteminin normal fəaliyyətində iştirak edən vacib maddələrdən biridir. Sitrus meyvələri, kivi, çiyələk, bibər, kələm və brokoli bu vitaminlə zəngindir. Həmin məhsulların müntəzəm istehlakı orqanizmin gündəlik C vitamini ehtiyacını qarşılamağa kömək edir.
D vitamini çatışmazlığına diqqət yetirin
Payız və qışda günəşli saatların azalması D vitamini səviyyəsinə təsir göstərə bilər. Bu vitamin immun sisteminin fəaliyyəti ilə yanaşı, sümüklərin möhkəmliyi üçün də vacibdir. Çatışmazlıqdan şübhələnildikdə müvafiq analiz vermək və nəticəyə uyğun olaraq həkimlə məsləhətləşmək lazımdır.
Sağlam qidalanma rejimi yaradın
İmmunitetin dəstəklənməsi üçün orqanizm zülal və müxtəlif mikroelementlərlə təmin olunmalıdır. Balıq, yumurta, toyuq əti, paxlalılar, süd məhsulları və çərəzlər gündəlik menyuda yer almalıdır. Məhdudlaşdırıcı pəhrizlər əvəzinə müxtəlif və balanslı qidalanmaya üstünlük verilməsi tövsiyə olunur.
Yuxu saatlarını qaydaya salın
Gecə yuxusunun keyfiyyəti orqanizmin bərpası və müdafiə mexanizmlərinin fəaliyyəti üçün əhəmiyyətlidir. Yetkin insanların sutkada 7-9 saat yatması məsləhət görülür. Hər gün eyni saatlarda yatıb oyanmaq yuxu rejiminin tənzimlənməsinə kömək edir.
Gündəlik hərəkəti həyatınızın bir hissəsinə çevirin
Fiziki aktivlik ümumi sağlamlığın qorunmasında mühüm amildir. Hava şəraiti imkan verdikdə açıq havada gəzmək, evdə idman etmək və gündəlik hərəkəti artırmaq faydalıdır. Bununla yanaşı, mövsümə uyğun geyinmək də vacibdir.
Kifayət qədər maye qəbul edin
Soyuq havalarda susuzluq hissi əvvəlki qədər güclü olmasa da, orqanizmin suya ehtiyacı davam edir. Gün ərzində müntəzəm su içmək və maye ilə zəngin qidalardan istifadə etmək lazımdır.
Qeyd edək ki, immuniteti qorumaq üçün yalnız vitamin preparatlarına güvənmək düzgün yanaşma deyil. Sağlam qidalanma, keyfiyyətli yuxu, müntəzəm fiziki aktivlik və şəxsi gigiyena qaydalarına əməl etmək infeksiyalardan qorunmağa kömək edən əsas amillərdəndir.



