Türkiyənin "Qalatasaray" klubu İngiltərənin "Mançester Yunayted" komandasında çıxış edən portuqaliyalı ulduz Bruno Fernandeşi heyətinə qatmaq istəyir.
Demokrat.az xəbər verir ki, bu barədə Türkiyənin "Fanatik" nəşri məlumat yayıb.
Məlumata görə, İstanbul təmsilçisi qış transfer pəncərəsində 31 yaşlı yarımmüdafiəçinin transferi üçün yenidən hərəkətə keçməyə hazırlaşır. Fernandeşin İngiltərə klubunun rəhbərliyini tənqid etməsi və yeni müqavilə təkliflərini qəbul etməməsi onun komandadan ayrılması ehtimalını artırıb.
"Mançester Yunayted"in yeni baş məşqçisi Maurisio Poçettinonun İtaliyanın "Komo" klubunda çıxış edən 22 yaşlı həmyerlisi Niko Pazı transfer etmək istədiyi bildirilir. İngiltərə mətbuatının iddiasına görə, bu keçid reallaşarsa, mövsümün sonunda müqaviləsi başa çatacaq Fernandeşlə qışda yollar ayrıla bilər.
"Qalatasaray" rəhbərliyinin İngiltərədəki vəziyyəti yaxından izlədiyi, komandanın digər portuqaliyalı futbolçusu Rafael Leaonun da Fernandeşi transferə razı salmaq üçün prosesə qoşula biləcəyi qeyd olunur.
Qeyd edək ki, Bruno Fernandeş 2020-ci ilin yanvarında 65 milyon avro qarşılığında "Sportinq"dən "Mançester Yunayted"ə keçib. O, İngiltərə klubunun heyətində keçirdiyi 341 rəsmi matçda 113 qol vurub və 111 məhsuldar ötürmə verib. Portuqaliyalı futbolçu iki dəfə Premyer Liqada mövsümün oyunçusu seçilib, UEFA Avropa Liqasında isə iki dəfə bombardir olub.



