Mikrodalğalı soba əksər evlərdə əsasən yeməkləri qızdırmaq üçün istifadə olunur. Lakin bu məişət cihazından gündəlik işlərdə daha fərqli məqsədlərlə də yararlanmaq mümkündür.
Demokrat.az xəbər verir ki, "UNIAN" nəşri mikrodalğalı sobanın 6 gözlənilməz istifadəsini təqdim edib.
Mətbəx süngərlərini dezinfeksiya etmək
Mətbəxdə tez-tez istifadə olunan süngərlər qısa müddətdə çirklənir və xoşagəlməz qoxu verə bilir. Onu su ilə isladıb mikrodalğalı sobada maksimum gücdə təxminən 1 dəqiqə qızdırmaq olar. Yaranan isti buxar bakteriyaların böyük hissəsinin məhv edilməsinə kömək edə bilər.
Kərə yağını yumşaltmaq
Resept üçün yumşaq kərə yağı lazımdırsa, amma onu əvvəlcədən soyuducudan çıxarmağı unutmusunuzsa, mikrodalğalı sobadan istifadə edə bilərsiniz. Yağı təxminən 10 saniyə qızdırmaq onun yumşalmasına, lakin tam əriməməsinə kömək edir.
Bankaları sterilizasiya etmək
Konserv hazırlayarkən şüşə bankaları qaynatmaq əvəzinə mikrodalğalı sobadan da istifadə etmək mümkündür. Bunun üçün təmiz bankaya az miqdarda su töküb 2-3 dəqiqə sobada saxlamaq olar. Lakin prosesdən sonra şüşə çox isti olacağı üçün onu çıxararkən ehtiyatlı olmaq lazımdır.
Qurumuş çörəyi yumşaltmaq
Çörək köhnəlib quruyubsa, onu atmağa tələsməyin. Çörəyi nəm dəsmala büküb mikrodalğalı sobada maksimum gücdə 20-30 saniyə qızdırmaq mümkündür. Bu, çörəyin yenidən yumşalmasına kömək edir. Lakin yumşaldıqdan sonra onu dərhal yemək məsləhətdir, çünki qısa müddət sonra yenidən bərkiyə bilər.
Soğan doğrayan zaman göz yaşarmasının qarşısını almaq
Soğanın yaratdığı göz yaşarmasını azaltmaq üçün onu doğramazdan əvvəl yarısını mikrodalğalı sobada təxminən 30 saniyə qızdırmaq olar. İstilik soğanın göz və selikli qişaları qıcıqlandıran bəzi birləşmələrinin təsirini azaltmağa kömək edə bilər.
Evdə çips hazırlamaq
Mikrodalğalı sobadan kartof və ya alma çipsləri hazırlamaq üçün də istifadə etmək mümkündür. Bunun üçün məhsulu nazik dairələr şəklində doğramaq, perqament sərilmiş boşqaba bir qat halında düzmək və xırtıldayanadək mikrodalğalı sobada qızdırmaq lazımdır. Müddət məhsulun növündən və sobanın gücündən asılı olaraq dəyişə bilər.
Beləliklə, düzgün istifadə edildikdə mikrodalğalı soba yalnız yemək qızdıran cihaz deyil, gündəlik məişət işlərində də faydalı köməkçi ola bilər.
Jalə
