Qış mövsümü yaxınlaşdıqca şkafdan sviter, gödəkçə və palto çıxarılır. Lakin aylarla şkafda qalan təmiz paltarlarda belə xoşagəlməz, "kiflənmiş" qoxu yarana bilər.
Demokrat.az xəbər verir ki, bu barədə "Lovedeco" yazıb.
Bunun əsas səbəblərindən biri paltarın liflərində qalan tər, dəri yağı, kosmetika və toz kimi maddələrdir. Həmçinin geyimlərin şkafda həddindən artıq sıx yerləşdirilməsi havanın dolaşmasına mane olur. Paltarların tam qurumadan şkafa qoyulması da zamanla qoxunun yaranmasına səbəb ola bilər.
Ən effektiv üsul yumaqdır. Lakin yun və digər qalın geyimləri yüksək temperaturda yumaq olmaz. Paltarın etiketində göstərilən yuma qaydalarına əməl etmək lazımdır.
Yuyulması mümkün olmayan geyimləri isə bir neçə saat açıq havada saxlamaq olar. Günəş işığı bəzi mikroorqanizmlərin azalmasına kömək edə bilər, amma zərif parçaları uzun müddət birbaşa günəş altında saxlamaq rənglərin solmasına səbəb ola bilər.
Sirkədən də istifadə etmək mümkündür. Su ilə durulaşdırılmış az miqdarda sirkə bəzi parçalardakı xoşagəlməz qoxunu azaltmağa kömək edir. Lakin 1:1 nisbətində sirkə-su qarışığını bütün geyimlərdə istifadə etmək məsləhət görülmür. Xüsusilə yun, dəri və yalnız kimyəvi təmizləməyə icazə verilən geyimlərdə istehsalçının göstərişlərinə əməl etmək lazımdır.
Digər üsul isə su və spirt məhluludur. Spirt tez buxarlandığı və antimikrob xüsusiyyətlərə malik olduğu üçün bəzi tekstil məmulatlarının qoxusunu azaltmağa kömək edə bilər. Ancaq o da bütün parçalara uyğun deyil və bəzi boyalara və örtüklərə zərər verə bilər.
Palto və gödəkçələri təzələmək üçün buxardan da istifadə etmək olar. Bunun üçün geyimi asqıda hamamda isti duş zamanı saxlamaq mümkündür. Lakin suyun birbaşa parçaya dəyməsinə yol vermək olmaz. Prosedurdan sonra geyim mütləq havalandırılmalı və tam qurudulmalıdır.
Zəif qoxu zamanı çörək sodası da kömək edə bilər. Geyimi soda olan qabın içində bir neçə saat və ya gecə ərzində saxlamaq, daha sonra sodanı tam təmizləmək mümkündür. Aktivləşdirilmiş kömür də qoxunu özünə çəkə bilər. Bu halda geyim 24-48 saat ərzində kömür olan qabda saxlanılır, lakin kömür parçaya toxunmamalıdır.
Qəhvə və qurudulmuş qəhvə çöküntüsü də qoxunu udur, amma özünün güclü qoxusu var və parçanı ləkələyə bilər. Buna görə bahalı və zərif geyimlərdə bu üsuldan istifadə etmək tövsiyə edilmir.
Mütəxəssislər həmçinin paltarları şkafa qoymazdan əvvəl onların tam quruduğuna əmin olmağı və şkafı həddindən artıq doldurmamağı məsləhət görürlər.
Jalə
