Saç baxımı üzrə mütəxəssis Anabel Kinqsli saçqurutma zamanı saç diblərindən başlamaq əvəzinə əvvəlcə saçın uzunluqlarını və uclarını qurutmağın dolaşıqlığı, qabarmanı və saçların zədələnmiş görünüşünü azaltmağa kömək edə biləcəyini bildirir.
Demokrat.az xəbər verir ki, saç qurudarkən diblərdən başlayaraq uclara doğru hərəkət etmək bir çox insan üçün vərdişə çevrilib. Lakin saç baxımı üzrə mütəxəssis Anabel Kinqslinin sözlərinə görə, daha yaxşı nəticə əldə etmək üçün prosesi əks istiqamətdə aparmaq lazımdır. Kinqsli "Daily Mail"ə açıqlamasında saçın əvvəlcə üst hissəsinin qurudulmasının uzunluqların müxtəlif istiqamətlərə dağılmasına səbəb ola biləcəyini deyib.
"Saçınızın üst hissəsini əvvəlcə qurutsanız, uzunluqlar müxtəlif istiqamətlərə dağılabilir", deyən Kinqsli saç uclarının adətən daha nazik, daha çox zədələnmiş və daha məsaməli olduğunu vurğulayıb. Onun sözlərinə görə, xüsusilə nəm saç ucları bir-birinə yapışmağa və dolaşmağa daha meyilli olur. Bu isə ucların zədələnmiş görünüşünə səbəb olmaqla yanaşı, qırılmalara da yol aça bilər.
Saç uclarındakı qabarmanın səbəbi hidrogen rabitələri ola bilər
Kinqsli yeni "Haircare: The Ultimate Guide" kitabında bu məsələyə toxunaraq saçın üst və ya ön hissəsindən qurudulmağa başlanmasının uclarda dolaşıqlıq və qabarmaya səbəb ola biləcəyini qeyd edir.
Mütəxəssis bu təsirin saçın strukturundakı hidrogen rabitələri ilə əlaqəli olduğunu bildirir.
"Saçınızdakı hidrogen rabitələri ən zəif, lakin ən çoxsaylı rabitələrdir. Saçınızı islatdığınız zaman qırılır və saçınız quruduqda yenidən əmələ gəlirlər", deyə Kinqsli bildirib. Onun sözlərinə görə, məhz bu rabitələr saçlara müxtəlif formalar verməyə imkan yaradır.
Hidrogen rabitələri atmosferdəki rütubətdən də təsirlənir. Buna görə də diqqətlə formaya salınmış saçlar rütubətli və ya yağışlı havalarda qısa müddətdə formasını itirə bilər.
Kinqsliyə görə, saçın üst hissəsini əvvəlcə qurutmaq uzunluqlardakı hidrogen rabitələrinin təsadüfi şəkildə yenidən yaranmasına səbəb ola bilər. Nəticədə saç daha quru və qabarmış görünə bilər.
Bu görünüşü düzəltmək istəyən insanlar daha yüksək temperaturdan və ya daha sərt formaverici üsullardan istifadə edə bilərlər. Lakin mütəxəssis yüksək temperaturun saç uclarına daha çox zərər verə biləcəyini bildirir.
"Uclarınız daha köhnə olduğu üçün onsuz da daha məsaməli və zədələnmiş vəziyyətdədir. Buna görə onlara həqiqətən zərif davranmaq lazımdır", deyən Kinqsli saç uclarının tamamilə islanmış vəziyyətdə deyil, hələ nəm ikən aşağı və ya orta temperaturda qurudulmasını tövsiyə edir.
Əvvəlcə uclar, daha sonra saç dibləri
Mütəxəssisin təklif etdiyi üsulda ilk olaraq saçın uzunluqları və ucları formaya salınır. Bunun sayəsində həddindən artıq istilikdən və ya fırça ilə yüksək gərginlik tətbiq etməkdən istifadə etmədən saçlara forma vermək asanlaşa bilər.
Saç diblərinin isə saç sıxlığının daha çox olması səbəbindən adətən daha uzun müddətdə quruduğu bildirilir. Uclar formaya salındıqda diblərin hələ də formaverilməyə imkan verəcək qədər nəm qalması gözlənilir.
Əgər saç dibləri vaxtından əvvəl quruyarsa, temperaturu artırmaq əvəzinə həmin hissəni az miqdarda su ilə yenidən nəmləndirmək tövsiyə olunur.
Saç quruluşunun hər insanda fərqli olduğunu vurğulayan Kinqsli bu üsulun hər kəsdə eyni nəticəni verməyə biləcəyini də qeyd edib.
"Əlbəttə, hər kəsin saçı fərqlidir və bəzi insanlar saçlarının üst hissəsini əvvəlcə qurudanda əldə etdikləri nəticəni bəyənə bilərlər. Lakin klinikamızdakı pasiyentlərdə çox yaxşı nəticə verdiyi üçün bu üsulu sınamağınızı tövsiyə edirəm", deyə mütəxəssis bildirib.
Jalə
