Android smart saatları artıq yalnız vaxtı göstərən cihazlar deyil. Müasir modellər yuxu və sağlamlıq göstəricilərini izləyir, məşqləri qeydə alır, bildirişləri göstərir, musiqi səsləndirir və bəzi hallarda telefon olmadan zənglərə cavab verməyə imkan verir.
Demokrat.az xəbər verir ki, "TechRadar" ekspertləri 2026-cı ildə müxtəlif istifadə ssenariləri və büdcələr üçün beş modeli seçiblər.
"Google Pixel Watch 5" – əksər istifadəçilər üçün uyğun seçim hesab olunur. Saat Wear OS 7 ilə işləyir, 32 GB yaddaşa malikdir və 41 və 45 mm ölçülərində təqdim edilir. AMOLED LTPO ekranının parlaqlığı 3000 nitə çatır, Always-On Display aktiv olduqda batareyanın işləmə müddəti isə 40 saata qədərdir. GPS, sağlamlıq, yuxu və idman izləmə funksiyaları əsas üstünlüklərdəndir. Mənfi cəhətlər arasında tez-tez enerji doldurmaq və bəzi "Google Health" funksiyalarının ödənişli olması göstərilir.
"Samsung Galaxy Watch 7" – qiymət və imkanlar baxımından seçilən modellərdəndir. Wear OS əsasında çalışan saat 1,3 düymlük Super AMOLED ekrana və 16 GB yaddaşa sahibdir. BioActive Sensor sağlamlıq və fiziki aktivlik göstəricilərini izləyir. Batareyanın orta səviyyədə olması və bəzi funksiyaların yalnız "Galaxy" smartfonları ilə işləməsi çatışmazlıqlar sırasındadır.
"OnePlus Watch 3" – uzun batareya ömrü istəyənlər üçün nəzərdə tutulub. "TechRadar" testlərinə görə, cihazın işləmə müddəti 120 saata qədərdir. LTPO AMOLED ekran, EKQ, ürək yoxlaması və ikizolaqlı GPS əsas xüsusiyyətləridir. Bununla belə, saat kifayət qədər iri və ağırdır, LTE dəstəyi yoxdur.
"Samsung Galaxy Watch 8" – "Samsung" smartfonları ilə istifadə üçün nəzərdə tutulan modeldir. Wear OS 6 və One UI Watch 8 ilə işləyir, 3 nanometrlik Exynos W1000 prosessoru və 32 GB yaddaşa malikdir. Sağlamlıq monitorinqi, yuxu analizi, ürək döyüntüsünün ölçülməsi və bədən tərkibinin analizi funksiyaları təqdim olunur. Əsas çatışmazlıq isə intensiv istifadədə təxminən bir günlük batareya ömrüdür.
"Samsung Galaxy Watch Ultra 2" – idman və sərt şərait üçün hazırlanmış modeldir. 1,5 düymlük Super AMOLED ekran, 64 GB yaddaş, LTE və 800 mAh batareya ilə təchiz olunub. Always-On Display aktiv olduqda testlərdə təxminən 60 saat işləyib. EKQ, ürək döyüntüsü, yuxu və bədən tərkibinin monitorinqi ilə yanaşı, WR100 suya davamlılıq göstəricisinə malikdir. Saatın 61 qramlıq çəkisi isə bəzi istifadəçilər üçün narahatlıq yarada bilər.
Beləliklə, 2026-cı ildə Android istifadəçiləri üçün seçim əsasən cihazın batareya ömrü, sağlamlıq funksiyaları, idman imkanları və istifadə olunan smartfonun markasından asılıdır.
Jalə
