Aralıqlı oruc son illərdə arıqlamaq və sağlamlığı yaxşılaşdırmaq üçün məşhur üsullardan birinə çevrilib. Lakin yeni elmi araşdırmalar bu qidalanma formasının faydalarının sosial mediada təqdim edildiyi qədər böyük olmaya biləcəyini göstərir.
Demokrat.az Türkiyə KİV-inə istinadən xəbər verir ki, bu üsul günün müəyyən saatlarında qida qəbulunu məhdudlaşdırmağı və ya həftənin bəzi günlərində daha az yeməyi nəzərdə tutur. Araşdırmalara görə, insanlarda aralıqlı oruc orta hesabla təxminən 5 faiz çəki itkisi ilə nəticələnə bilər. Bu göstərici digər kalori məhdudlaşdıran pəhrizlərin nəticələri ilə təxminən eynidir.
Aralıqlı orucun qan təzyiqi və xolesterin kimi bəzi metabolik göstəriciləri yaxşılaşdıra biləcəyi də müəyyən edilib. Lakin xərçəngin qarşısının alınması, beyin funksiyalarının yaxşılaşdırılması və ömrün uzadılması ilə bağlı daha iddialı nəticələrin əsas hissəsi heyvanlar üzərində aparılan tədqiqatlara əsaslanır.
Mütəxəssislər bildirirlər ki, siçanlarda müşahidə edilən nəticələri insanlara birbaşa tətbiq etmək düzgün deyil. Məsələn, gəmiricilərin metabolizmi insanlardan daha sürətlidir və onların bir neçə saatlıq aclığı insan üçün daha uzunmüddətli aclığa bərabər ola bilər.
Tədqiqatların nəticələrinin bir-birindən fərqlənməsinin əsas səbəblərindən biri isə insanların əslində nə qədər və nə yediyini dəqiq müəyyənləşdirməyin çətin olmasıdır. İnsanlardan qida gündəliyi aparmaları istənilsə də, onlar porsiyaları düzgün xatırlamaya və ya bəzi qidaları qeyd etməyə bilər.
2025-ci ildə aparılan araşdırmalardan biri insanların qida qəbulunu orta hesabla 400-800 kalori az göstərdiyini ortaya qoyub. Bu səbəbdən alimlər daha dəqiq nəticələr əldə etmək üçün qan və sidik analizləri, geyilə bilən cihazlar, qida fotoşəkilləri və hətta çeynəmə hərəkətlərini izləyən sensorlar kimi texnologiyalardan istifadə etməyə başlayıblar.
Mütəxəssislərin fikrincə, hazırkı elmi məlumatlar aralıqlı orucun faydasız olduğunu göstərmir. Əksinə, bu üsul bəzi insanlarda çəki və metabolik göstəricilərin yaxşılaşmasına kömək edə bilər. Ancaq onu bütün xəstəliklərin qarşısını alan və ömrü əhəmiyyətli dərəcədə uzadan “möcüzəvi” qidalanma üsulu kimi təqdim etmək üçün kifayət qədər sübut yoxdur.
Jalə Demokrat.az
