Yüksək sürətli şəbəkələrin batareyanın sağlamlığını pozduğu ilə bağlı iddialar istifadəçiləri narahat etməkdə davam edir. İlk nəsil çiplərlə bağlı problemlərdən qaynaqlanan bu miflər səbəbindən bir çox insan cihazlarının təqdim etdiyi ən mühüm texnoloji üstünlüklərdən birindən, yəni 5G bağlantısından istifadə etməməyə üstünlük verir.
Demokrat.az xəbər verir ki, texnologiyanın ilk dövrlərində zəif əhatə dairəsi və tez qızan çiplər batareyaların 4G ilə müqayisədə daha sürətlə tükənməsinə səbəb olurdu. Aradan keçən illərə baxmayaraq, həmin ilk təəssüratlar ağızdan-ağıza yayılaraq bu günə qədər gəlib çatıb.
Müasir şəraitdə isə vəziyyət xeyli fərqlidir. Yeni nəsil çipsetlər sayəsində 4G və 5G arasındakı enerji sərfiyyatı fərqi demək olar ki, nəzərəçarpacaq səviyyədə deyil. Batareyanın sürətlə tükənməsində şəbəkəni günahlandırmaq əvəzinə tətbiqlərdən istifadə vərdişlərinə və ekran müddətinə diqqət yetirmək daha doğrudur.
Səhv 1: 5G 4G-dən daha çox batareya sərf edir
Ən geniş yayılmış fikirlərdən biri 5G bağlantısının hər şəraitdə həddindən artıq enerji sərf etməsidir. Lakin araşdırmalar ümumi batareya istifadəsindəki artımın cəmi 6-11 faiz arasında olduğunu göstərir.
İlk illərdə yadda qalan yüksək enerji sərfiyyatı maneələri aşmaqda çətinlik çəkən ultra yüksək tezliklərdən qaynaqlanırdı. İstifadəçilərin əksəriyyətinin gündəlik yararlandığı aşağı və orta diapazonlar enerji sərfiyyatı baxımından 4G-yə çox bənzər şəkildə işləyir. Yalnız yüksək diapazonlar əlavə enerjiyə ehtiyac duyur.
Telefon bu tezliklərə qoşulduqda belə, müasir avadanlıqlar köhnə nəsil modemlər kimi batareyanı sürətlə tükəndirmir.
Səhv 2: Telefon gözləmə rejimində olarkən də batareyanı tükədir
Cihaz istifadəsiz vəziyyətdə olduqda belə avadanlığın arxa planda batareya sərf etməyə davam etdiyi düşünülür. Əslində telefon gözləmə rejiminə keçdikdə modem sistemi minimum enerji rejiminə keçir.
Gecə ərzində baş verən enerji itkisinin əsas səbəbləri isə arxa planda məlumatları yeniləyən tətbiqlərdir. Bildirişlər və sinxronizasiya prosesləri səssiz şəkildə enerji sərf etdiyi halda, bunun günahını şəbəkənin üzərinə atmaq düzgün deyil.
Səhv 3: Yüksək yükləmə sürəti birbaşa daha çox batareya sərfiyyatına səbəb olur
Sürət artdıqca enerji sərfiyyatının da eyni nisbətdə yüksəldiyi düşünülür. Lakin məlumat ötürmə sürəti ilə enerji sərfiyyatı arasında birbaşa əlaqə yoxdur.
Yüksək sürət cihazın yükləmə prosesini daha qısa müddətdə başa çatdıraraq yenidən aşağı enerji rejiminə keçməsinə imkan verir. "Telefónica" tərəfindən aparılan araşdırmalar məlumat trafiki nəzərə alındıqda bu infrastrukturun 90 faiz daha səmərəli olduğunu göstərir.
Batareyanın daha tez tükənməsinə səbəb olan əsas amil isə yüksək sürətin yaratdığı istifadə vərdişləridir. Sürətli bağlantı insanları daha çox video izləməyə və iri həcmli fayllar yükləməyə sövq edə bilər. Bu halda batareyanı tükədən şəbəkənin özü deyil, telefondan istifadə müddətinin artmasıdır.
Səhv 4: Davamlı istifadə batareyanın sağlamlığını qalıcı şəkildə pozur
5G-nin litium-ion batareyaların kimyəvi quruluşunu pozduğu və cihazın ömrünü qalıcı şəkildə qısaltdığı iddia olunur. Halbuki batareya tutumunun zamanla azalmasına əsasən şarj dövrləri, həddindən artıq temperatur və cihazın yaşı təsir edir.
Qoşululan şəbəkə növünün batareyanın kimyəvi qocalmasına birbaşa mənfi təsiri yoxdur. Həddindən artıq qızma batareyanın sağlamlığına təsir göstərə bilsə də, bunun texnologiyanın özündən çox konkret modelə xas proqram təminatı problemləri ilə əlaqəli olduğu bildirilir.
` 5: 5G-ni söndürmək ən məntiqli həll yoludur
Ən çox verilən tövsiyələrdən biri 5G-ni tamamilə söndürərək 4G-yə keçməkdir. Bu yanaşma mövcud olmayan problemi həll etmək naminə daha üstün bağlantı imkanlarından imtina etmək deməkdir.
Bunun əvəzinə cihazlarda mövcud olan ağıllı şəbəkə rejimlərini aktivləşdirmək daha məqsədəuyğundur. Siqnalın çox zəif olduğu ərazilərdə telefonun davamlı olaraq şəbəkə axtarmasının qarşısını almaq üçün 5G-ni müvəqqəti söndürmək faydalı ola bilər.
Digər hallarda isə cihazın proqram təminatını aktual saxlamaq və batareyaya qənaət etmək üçün tətbiqlərin icazələrini məhdudlaşdırmaq daha effektiv nəticə verə bilər.
Jalə Demokrat.az
