Vaxtilə geniş populyarlıq qazanan bəzi "adlı" pəhrizlər bu gün artıq aktuallığını itirib və bəzi hallarda faydadan çox zərər verə bilər.
Demokrat.az xəbər verir ki, bu barədə həkim-diyetoloq Yelena Ustinova gazeta.ru-ya müsahibəsində danışıb.
Mütəxəssisin sözlərinə görə, ən faydasız pəhrizlər sırasında ilk növbədə qan qrupuna əsaslanan pəhriz, Yaponiya pəhrizi, Kim Protasov pəhrizi və digər oxşar qidalanma sistemləri göstərilə bilər.
"Bütün bu pəhrizlər artıq aktuallığını və mənasını itirib", deyə həkim bildirib.
Yelena Ustinova izah edib ki, arıqlamaq istəyən insanlar üçün effektiv pəhriz dəbdə olan qidalanma sistemi deyil, kalori çatışmazlığı yaradan, kifayət qədər zülal, normal miqdarda yağ və məhdud karbohidrat ehtiva edən qida rasionudur.
"Daha çox karbohidratların həddindən artıq qəbulu nəticəsində yaranan artıq kalori piy toxumasının yığılmasına səbəb olur", deyə diyetoloq vurğulayıb.
Onun sözlərinə görə, bütün insanlar üçün uyğun olan universal "ən yaxşı pəhriz" mövcud deyil. Ən effektiv pəhriz insanın həyat tərzinə, qidalanma rejiminə, dad seçimlərinə uyğun gələn və uzun müddət riayət edə biləcəyi qidalanma modelidir.
Həkim əlavə edib ki, hazırda növbəti dəbli pəhrizi axtarmağa ehtiyac yoxdur. Müasir texnologiyalar, o cümlədən süni intellekt vasitəsilə insanın gündəlik kalori ehtiyacı, zülal, yağ və karbohidrat nisbəti, qidalanma rejimi və sevdiyi məhsullar nəzərə alınmaqla fərdi qida rasionu hazırlamaq mümkündür.
Yelena Ustinova bildirib ki, məşhur pəhrizlərin əsas çatışmazlığı onların balanssız olmasıdır.
"Bu pəhrizlər adətən çox aşağı kalorili olur, kifayət qədər zülal ehtiva etmir və uzunmüddətli istifadə üçün uyğun deyil. Nəticədə insan ya tez bir zamanda pəhrizi yarımçıq qoyur, ya da yalnız piy deyil, əzələ kütləsini də itirir", deyə o xəbərdarlıq edib.
Diyetoloqun fikrincə, məhz buna görə də "adlı pəhriz" anlayışı bu gün böyük ölçüdə aktuallığını itirib:
"Ən vacibi insanın qida rasionunu özü hesablamağı öyrənməsi və ya qidalanmanı fərdiləşdirməyə imkan verən müasir vasitələrdən istifadə etməsidir".
Sonda həkim vurğulayıb ki, hər bir insan öz məqsədlərinə və həyat tərzinə uyğun qidalanma planı hazırlaya bilər:
"Əsas məsələ zülal, yağ və karbohidrat balansını qorumaq, kaloriliyi nəzarətdə saxlamaq və sevilən qidaları rasiondan çıxarmamaqdır. Məhz bu yanaşma istənilən dəbli pəhrizdən daha effektiv nəticə verir".
Jalə Demokrat.az
