Tayvanlı alimlərin apardığı yeni araşdırma göstərir ki, tropik bölgələrdə geniş yayılmış Centella asiatica bitkisindən əldə edilən hüceyrəvezikullarını ehtiva edən eksperimental saç serumu saçların böyüməsini sürətləndirə, həmçinin onların qalınlığını və sıxlığını əhəmiyyətli dərəcədə artıra bilər.
Demokrat.az xəbər verir ki, araşdırma çərçivəsində 60 sağlam kişi və qadının iştirakı ilə 56 gün davam edən klinik sınaq keçirilib. İştirakçılar beş qrupa bölünüb və hər qrup gündə bir dəfə fərqli tərkibli serumdan istifadə edib.
Ən yüksək nəticə kofein, pantenol, fibroblast böyümə faktoru 7 (FGF7), insulinəbənzər böyümə faktoru 1 (IGF-1) və Centella asiatica bitkisindən əldə edilən hüceyrəvezikullarını birləşdirən formuldan istifadə edilən qrupda qeydə alınıb.
Tədqiqatın nəticələrinə görə, bu formuldan istifadə edən iştirakçılarda səkkiz həftə ərzində saçların qalınlığı və sıxlığı plasebo qrupu ilə müqayisədə 101 faiz artıb. Bundan əlavə, saçların uzanma sürəti təxminən 17 faiz yüksəlib. İştirakçılarda bu müddət ərzində saç uzunluğunda orta hesabla əlavə 3,5 santimetr artım müşahidə olunub. Eyni zamanda, saç tökülməsi 47 faiz, baş dərisinin yağlanması isə 25 faiz azalıb.
Alimlər hesab edirlər ki, bitki mənşəli hüceyrə siqnallarının laboratoriyada hazırlanmış böyümə faktorları ilə birləşdirilməsi ayrı-ayrı komponentlərin təkbaşına istifadəsi ilə müqayisədə daha effektiv nəticə verir və gələcəkdə saç tökülməsinin müalicəsində yeni yanaşmaya çevrilə bilər.
Bununla belə, tədqiqatın müəllifləri nəticələrin hələlik ilkin xarakter daşıdığını vurğulayırlar. Sınaqda keçəllikdən əziyyət çəkməyən, əsasən gənc və orta yaşlı könüllülər iştirak edib, müşahidə müddəti isə cəmi 56 gün olub. Bundan başqa, araşdırma sınaqdan keçirilən serumu hazırlayan şirkət tərəfindən maliyyələşdirilib.
Mütəxəssislər preparatın saç tökülməsindən əziyyət çəkən insanlar üzərində uzunmüddətli təsirini qiymətləndirmək üçün daha genişmiqyaslı klinik tədqiqatların aparılmasının zəruri olduğunu bildirirlər.
Jalə Demokrat.az
