ABŞ-da “ət yeyən parazit” kimi tanınan Yeni Dünya qurdu milçəyi infestasiyası ilə bağlı narahatlıq yenidən gündəmə gəlib.
Demokrat.az xəbər verir ki, Texasdan sonra Nyu-Meksikoda da yeni yoluxma halının təsdiqlənməsi, xəstəliyin yayılma riskini artırıb.
Rəsmilərin məlumatına görə, bu il ölkədə ən azı bir neçə yoluxma faktı qeydə alınıb və hallar əsasən heyvanlarda aşkar edilib. Parazit xüsusilə açıq yaralara yumurta qoyaraq sürətlə inkişaf edən sürfələrlə canlı toxuma ilə qidalanır.
Mütəxəssislər bildirir ki, sürfələr qısa müddətdə aktivləşir və yaranın dərinləşməsinə, ciddi infeksiyalara və ağır hallarda ölüm riskinə səbəb ola bilər. Bu səbəbdən xəstəlik “ət yeyən” adlandırılır.
Son qeydlərə görə, Texas və Nyu-Meksiko sərhədinə yaxın ərazilərdə heyvanlarda yoluxma halları aşkarlanıb. ABŞ Kənd Təsərrüfatı Nazirliyi vəziyyəti nəzarətdə saxlamağa çalışır. Eyni zamanda Meksika və Mərkəzi Amerikada minlərlə insan yoluxması qeydə alındığı bildirilir ki, bu da regional riskin geniş olduğunu göstərir.
Mütəxəssislər aşağıdakı tədbirləri tövsiyə edir:
* Açıq yaraların dərhal təmizlənməsi və örtülməsi * Böcək kovuculardan (EPA təsdiqli) istifadə * Riskli ərazilərdə uzunqol geyim, şapka və corab geyinmək * Heyvanların gündəlik yoxlanması və şübhəli halların dərhal bildirilməsi
Həkimlər xəbərdarlıq edir ki, iy verən, sağalmayan və ya içində hərəkət hiss olunan yaralar ciddi əlamət ola bilər. Bəzi hallarda sürfələr burun, göz və qulaq ətrafında da görünə bilər.
Rəsmilər bildirir ki, vaxtında müdaxilə edilməzsə, parazit kənd təsərrüfatı və heyvandarlıq sektorunda ciddi iqtisadi itkilərə də səbəb ola bilər. ABŞ artıq mümkün geniş yayılmanın qarşısını almaq üçün əlavə tədbirlər görür.
Jalə Demokrat.az
