Qusar rayonunda 39 yaşlı kişi anasına xəsarət yetirib.
Demokrat.az-ın əldə etdiyi məlumata görə, hadisə bu ilin yanvarın 19-da rayonun kəndlərindən birində baş verib. Qusar rayon sakini, 1987-ci il təvəllüdlü Zeynal sərxoş vəziyyətdə yaşadığı kənddə yerləşən mağazada satıcı kimi işləyən anası Zibeydədən (adlar şərtidir – red.) spirtli içki olan araq məhsulunu istəyib.
Bu zaman aralarında baş vermiş mübahisə zəminində o, anasının üz nahiyəsinə əl-qol zərbələri ilə vurub və nəticəsində ona müxtəlif dərəcəli xəsarətlər yetirib.
Faktla bağlı Zeynalın barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə izahat verən Zeynal ona elan olunmuş ittiham üzrə özünü təqsirli bilib. O, ifadəsində göstərib ki, yanvarın 19-da, səhər saatlarında yaşadığı kənddə yerləşən qardaşı Cəmilə məxsus olan mağazaya gedib və spirtli içki alıb:
“Həmin arağı içdikdən sonra eyni tarixdə təxminən saat 16:30-da təkrar həmin mağazaya gedərkən orada satıcı kimi işləyən anam Zibeydə mənə mane oldu. Ona görə də spirtli içkini almaq məqsədilə aramızda yaranış mübahisə zəminində anamın üz nahiyəsinə əl-qol zərbələr ilə vurdum”.
Qusar Rayon Məhkəməsinin hökmü ilə Zeynal 1000 manat miqdarında cərimə olunub.
Fariz Məlikli Demokrat.az
