Gəncə şəhərində 2004-cü il təvəllüdlü Samir Hüseynov şəxsi münasibətlər zəminində yaranan mübahisə zamanı 1988-ci il təvəllüdlü Kamil Cəfərovu öldürüb.
Demokrat.az-ın əldə etdiyi məlumata görə, Samir 2023-cü ilin aprel ayının sonundan, həmin il iyun ayının ortalarına qədər Gəncə şəhəri, Ş.İ.Xətai prospekti, 114 ünvanında yerləşən marketdə fəhlə işlədiyi müddətdə qonşuluqda kafe işlədən tanışı Kamilin dəfələrlə kinayəli şəkildə onu təhqir etməsi və sonuncu dəfə iyunun 26-da, saat 20 radələrində “per-peyser” yanında işləyirsən, sən də onun tayısan” deməsindən hiddətlənib.
Samir bundan qəzəblənərək Kamilin sözlərini özünə təhqir, şərəf və ləyaqətinin alçaldılması kimi qiymətləndirib. O, Kamildən qisas alaraq onu öldürmək qərarına gəlib. Bir neçə dəfə Kamilin təxminən gecə 1 radələrində işlətdiyi kafeni bağladığını müşahidə edib. Samir iyunun 27-də, gecə saat 1 radələrində Kamilin icarədarı olduğu kafeyə gəlib, kənar şəxslər olmasına görə niyyətini həyata keçirə bilməyəcəyini başa düşüb. O, münasib zaman və şərait əldə etmək üçün Kamilin yanına gəlmiş Fərid ilə birlikdə yemək yeyib söhbət edib. Həmin gün təxminən 2-3 radələrində sonuncu və müştərilər kafedən getdikdən sonra kafenin həyətində özü və işlədiyi marketin sahibi haqqında söylədiyi fikirlərə iradını bildirib. Aralarında şəxsi münasibətlər zəminində münaqişə zamanı sanitar qovşağının girişində - sonuncunun özünü müdafiə imkanlarını məhdudlaşdıran dar sahədə bıçaqla çoxsaylı zərbələr vurub. Kamil 23 bıçaq zərbəsi alıb. O, kəskin qan itirmədən vəfat edib.
Hadisəni törədən Samirin barəsində Cinayət Məcəlləsinin 120.2.4-cü (xüsusi amansızlıqla və ya təhlükəli üsulla adam öldürmə) maddəsi ilə ittiham elan edilib.
Cinayət işi üzrə təqsirləndirilən şəxs qismində ifadə verən Samir ona elan olunmuş ittiham üzrə özünü qismən təqsirli bilib. O deyib ki, özünü Cinayət Məcəlləsinin 120.2.4-cü maddəsi ilə deyil, Cinayət Məcəlləsinin 120.1-ci (qəsdən adam öldürmə) maddəsi ilə təqsirli bilib.
Samirin ifadəsinə görə, Binəqədi rayonu, Biləcəri şosesi, DSK-4-də digər köçkünlər kimi yataqxanada ailə üzvləri - ata-anası, qardaşı ilə birlikdə yaşayıb: “Mən Azərbaycan Texnologiya Universitetinin İqtisadiyyat və İdarəetmə fakültəsinin marketinq ixtisası üzrə 2-ci kurs tələbəsi olmuşam. Təhsil aldığım universitet Gəncədə yerləşdiyindən həmin şəhərdə, N.Nərimanov prospektində ailəvi tanışım Südabəgildə pulsuz qalmışam. Rəsmi olaraq heç yerdə işləməsəm də, 2023-cü ilin aprel ayının sonlarından iyun 23-nə kimi Gəncə şəhəri Ş.İ.Xətai prospektində yerləşən “Yeni market”də günəmuzd fəhlə kimi işləmişəm. Tədris ili bitdiyinə görə işdən çıxmışam. İyulun 3-də kəsr imtahanım olduğu üçün Gəncədə qaldım. Yaşadığım evin yaxınlığında yerləşən kafeni işlədən Kamil adlı şəxsi isə işlədiyim marketə gəlib alış-veriş edən müştəri kimi tanımışam. Bir neçə dəfə Kamilin işlətdiyim kafenin qarşısından keçdikdə mənə kinayəli şəkildə “Elsevərin yanında işləyirsən?!!” desə də, ona fikir verməmişəm”.
Təqsirləndirilən şəxs deyib ki, son dəfə, axşam saat 19-20 radələrində kafenin qarşısından gedərkən Kamil kafenin giriş qapısının qarşısından onu “ata” səsləyib və kafeyə çağırıb: “İçəridə mənə yaxınlaşaraq Elsəvər kimi per-peysərin yanında işlədiyimi dedi, Elsevərin ünvanına söyüş söydü. Kamilin içkili olduğunu gördüm və dediklərinin mənə aidiyyatı olmadığını, ailəmə dəstək üçün yanında işlədiyimi bildirdim. Kamil isə mənə “sən də onun tayısan, onun yanında işləyirsən, sənin də var yoxun belə-belə olsun” dedi. Səbrimi basaraq Kamilə içkili olduğunu, ayıq olanda danışmağımızı dedim və evə getdim. Ancaq Kamilin dediyi sözləri yadımdan çıxara bilmədim, özümə yer tapmadım. Marketdə işlədiyim vaxtlar bir neçə dəfə gecə saat 1-2 radələrində işdən çıxaraq evə gedəndə Kamilin kafeni bağlayıb, “Dan Ulduzu” istiqamətində mağazanın qarşısından keçdiyini gördüyüm üçün onun tək olduğu vaxt münasibətlərimizə aydınlıq gətirmək üçün gecə təxminən 1 radələrində kafeyə getdim. Kafeyə çatanda çöldəki masalarda müştərilər olub. Kamil məni görüb kafeni içinə çağırdı və girişdən sağdakı pəncərənin qarşısındakı masada əyləşdirdi. Hərəmizə 1 bakal pivə gətirdi və birlikdə oturduq. Kamildən nə üçün Elsevər barədə kinayəli danışdığını soruşmaq istədim. Kamilin tanışı Fərid adlı şəxs gələrək masada əyləşdi. Söhbət vaxtı onun taksi fəaliyyəti ilə məşğul olduğunu öyrəndim. Kamil müştərilərə qulluq etdi, dönər sifariş etdi”.
Samir deyib ki, təxminən saat 2-3 radələrində Fərid və digər müştərilər çıxaraq gedəndən sonra Kamil çöldəki masa, stulları kafenin içərisinə yığıb, kafenin mətbəxindən keçərək həyətdəki masada oturublar: “Kamillə söhbətimizi davam etdirdim, Elsevərin tayı olmadığını dedim. Elsevərin peysər olduğunu deyən Kamil “səndə per-peysərin yanında işləyirsən” dedikdə mübahisələrimiz şiddətləndi. Kamil mənə var-yox söyüşü söydü. Kamil mətbəxə qaçıb bıçaq götürdü və üstümə gəldi. Mən isə özümü qorumaq üçün qaçaraq tualetə girdim.
Tualetə daxil olub qapını arxadan bağlamaq istəsəm də, qapının dəstəyi olmadığından bağlaya bilmədim. Əl-üz yuyulan yerə çıxdım, Kamillə üzbəüz gəldim. Kamil məni bıçaqla vurmaq istəyəndə geri çəkildim, sağ əlim ilə Kamilin sağ əlindən, sol əlimlə isə Kamilin sağ əlinin biləyindən tutdum, Kamilə mane oldum. Həmin vaxt sağ əlimin baş, işarə və orta barmağını bıçaq kəsdi. Kamilin bıçaq olan sağ əlinin biləyini özünə tərəf qatlayaraq Kamilin sağ böyrünə soxdum. Lakin Kamil sakitləşməyib yenə var-yox söyüşü söydüyü üçün əsəbiləşərək onu öldürmək qərarımı qətiləşdirim. Sağ əlimlə bıçağı Kamilin sağ böyründən çıxardım, bədəninin müxtəlif nahiyyələrinə bıçaqla zərbələr vurdum. Kamilə xəsarət yetirərkən hər iki əllə bıçağı məndən almaq istəyib və əlləri kəsilib. Mən Kamilə zərbələr vurduqca Kamil arxa-arxaya tualetin qarşısındakı dəhlizə doğru getdi. Əsəbi və özümdə olmadığımdan Kamilə neçə ədəd və bədəninin hansı tərəfinə bıçaqla vurduğumu bilmirəm. Kamil yerə yıxılıb qalıb. Mən isə bir neçə saat oturduğum yerdə qaldım. Hava işıqlaşanda bıçağı cibimə qoydum, əl-üzümü qana bulaşmış ayaqqabımı yudum. Pulum olmadığı üçün şalvarının arxa cibindən 30 manat pulu və mobil telefonu götürdüm, kafedən çıxdım, qapının içəri tərəfindəki açarı çıxarıb qapını çöldən bağladım. Sonra yaşadığım evə getdim. Evdə qana bulaşmış köynək və şalvarımı çıxarıb çantaya qoydum və evdən çıxdım. Ən ucqar hesab etdiyim yer Zaqatala olduğu üçün Gəncə avtovağzalından tanımadığım mikroavtobusa mindim və Zaqatalaya getdim. Zaqatalada fikrimi dağıtmaq üçün şəhəri piyada gəzdim və axşam saatlarında atam ilə telefonla danışdım. Bakıya gedib ailəm ilə sağollaşaraq təslim olmaq qərarına gəldim. Zaqataladan gecə avtobusa minərək Bakıya getdim. Saat 07 radələrində yaşadığım evə çatdım. Atam və digər ailə üzvlərimə hadisə barədə məlumat verdim. Atam Gəncədə yaşayan dostum ilə dəqiqləşmə apardı, hadisə barədə məlumat verdi. Yuyunduqdan sonra atam ilə Gəncə şəhərinə prokurorluğa gələrək təslim oldum”.
Bu cinayət işinə Gəncə Ağır Cinayətlər Məhkəməsində baxılıb. Məhkəmənin hökmü ilə Samir 17 il müddətinə azadlıqdan məhrum edilib. Onun cəzasını ciddi rejimli cəzaçəkmə müəssisəsində çəkməsi müəyyən edilib.
Fariz Məlikli Demokrat.az
