Tarixi binalara müdaxilələrin qarşısı alınacaq — Baş planda nələr nəzərdə tutulub?

Dövlət Şəhərsalma və Arxitektura Komitəsinin sədri Anar Quliyev Bakı şəhərinin 2040-cı ilədək inkişafına dair Baş planının təqdimatı mərasimində bildirib ki, bəzi ərazilərdə beş mərtəbədən hündür bina tikintisinə icazə verilməyəcək: “1000 hektardan çox ərazi var ki, bura xüsusi mühafizə olunan zona təyin olunub. Xüsusilə şəhərin mərkəzində tarixi mədəni irsə hörmət nəzərə alınaraq ciddi addımlar atılacaq”.

Maraqlıdır, bu vaxta qədər şəhərin mərkəzindəki tarixi binalara edilən müdaxilələrlə bağlı da hansısa tədbirlər görüləcəkmi?

Tanınmış memar Cahid Həsənov Demokrat.az-a açıqlamasında deyib ki, tarixi binalarla müdaxilələrlə bağlı məsələ yeni Baş planda öz əksini tapıb:

“Lakin müstəqillik dövründən başlayaraq bu vaxta qədər bu mövzuda ciddi problemlərlə üzləşmişik. Hətta bir neçə mərtəbəli tarixi binaların üst qatına mansard adı ilə artırmalar olunub, qarşısında hündürmərtəbəli binalar tikilərək görüntüsü pozulub. Bir memar kimi deyə bilərəm ki, həmin əlavə konstruksiyaların sökülməsi ilə bağlı hər zaman fikrimizi bildirmişik. Baş planda bu məsələlər əksini tapanadək də bu mövzuya həssas yanaşmamımız ifadə etmişik, bəzi problemlərin qarşısını almağa nail olmuşuq. İctimaiyyət və media da bu məsələdə aktiv olmalıdır, tarixi binalara müdaxilələr davam edən yerlərdə bunu işıqlandırmaq lazımdır”.

Törə Zeynallı Demokrat.az