Milli Şuranın Ukrayna ilə bağlı MƏKRLİ PLANI

Milli Şura Ukraynaya dəstək aksiyası keçirmək niyyətindədir. Bununla bağlı müvafiq qurumlara müraciət də ediblər və yer olaraq “Məhsul” stadionu, “Nərimanov” metrosunun ətrafı və “Ukrayna” dairəsi”ni istəyirlər.

Təbii ki, hər bir ölkədə olduğu kimi, Azərbaycanda da aksiya keçirmək konstitusion hüquqdur, başqalarının həyatına təsir etmədiyi müddətdə buna şərait yaradılır. Milli Şuranın indiyə qədər keçirdiyi aksiyaların aksiyadan daha çox, ətrafdakı insanlara narahatlıq yaratdığı gerçəyi də ayrı bir mövzudur. Burada diqqət çəkən məqam illərdir yoxa çıxan, real aləmdə heç nəyə nail ola bilmədiyi üçün bütün fəaliyyətini virtual aləmə köçürən bu qüvvələrin yağışdan sonra çıxan göbələk kimi ortaya çıxmasıdır.

Sual yaranır, Milli Şura niyə indi mitinq keçirmək eşqinə düşüb?

Bu sualın birdən çox cavabının olduğu və məqsədin heç də bu gün müharibə aparan Ukrayna olmadığı bəllidir.

İndiyə qədər real həyatda varlığı görünməyən Milli Şura belə bir aksiya ilə gündəmə gəlmək istəyir və Ukraynada baş verən müharibəni fürsət olaraq görürlər. Çünki keçirdikləri mitinqlərdə maksimum 300-500 adam toplayan Milli Şura düşünür ki, Ukrayna adından istifadə etməklə “çoxsaylı aksiya” keçirə və bunu “xalq bizi dəstəkləyir” görüntüsü yarana bilər.

Məqsəd nə Ukraynadakı müharibə, nə də Ukrayna xalqına dəstəkdir. İndiyə qədər ölkə daxilində istənilən hadisəni özünün siyasi maraqları naminə istifadə etməyə cəhd edən Milli Şura köhnə mərəzindən əl çəkmir və bu dəfə Ukrayna xalqının üzləşdiyi faciədən xal qazanmağa çalışır.

Burada əsas məqsədlərdən biri də bu qüvvələrə maliyyə ayıran xarici dairələrin qarşısında hesabatın verilməsidir. Məlumatlar var ki, bir müddət öncə xarici dairələr bu qüvvələrə müəyyən maliyyə yardımı ayırmaq qərarına gəlib, lakin bunun üçün Milli Şura “performans” göstərməli, əvvəlki mitinqlərdən fərqli olaraq, daha çoxsaylı aksiya keçirməlidir. Uzun müddətdir yoxa çıxan Milli Şura hansısa aksiya keçirərəsə, əvvəl ətraflarına topladıqları 300-500 iştirakçı da olmayacaq. Bu baxımdan, məhz Ukrayna məsələsini fürsət bilərək, belə bir aksiya keçirmək istəyirlər.

Bununla həm daha çox iştirakçı cəlb edə biləcəklərini, həm “xalq bizi dəstəkləyir” təbliğatını aparmaq imkanı qazanacaqlarını, həm də maliyyə dəstəyi əldə edəcəklərini düşünürlər. Əgər bunların aksiyasına icazə verilməsə, o zaman, Azərbaycan hakimiyyəti Ukraynanı dəstəkləmir kimi absurd iddialarını ortaya atacaqlar. Halbuki, Ukraynanın ərazi bütövlüyünü dəstəkləyən Azərbaycan region ölkələri arasında ən çox humanitar dəstək verən ölkədir. Milli Şura isə belə bir “aksiya gedişi” ilə Azərbaycanın verdiyi dəstəyi ört-basdır etmək, ölkəmizin beynəlxalq aləmdə imicini zədələmək niyyətindədir. Çünki onlar üçün milli və dövlət marağı yox, şəxsi ambisiyaları həmişə öndə olub.

Ukrayna xalqının faciəsindən də maliyyə və siyasi xal qazanmaq üçün istifadə etmək niyyətindədirlər. Necə deyərlər, “keçi can hayında, qəssab piy axtarır”. Milli Şura siyasi qəssabdan başqa bir şey olmadığını yenə də təsdiqləyir.

Zaur Hacılı Demokrat.az