Nazirlik Azərbaycandakı testlərin “Omikron”u aşkarlamadığı barədə iddialara cavab verdi

SOSİAL 10 yan 2022, 15:26
Səhiyyə Nazirliyi Azərbaycanda koronavirus infeksiyasına yoluxma hallarını müəyyənləşdirmək üçün istifadə olunan PCR testlərinin “Omikron” ştammını aşkarlamadığı barədə iddialara cavab verib.

Nazirliyinin mütəxəssis-eksperti, infeksionist Təyyar Eyvazov “Report”a açıqlamasında bildirib ki, yeni ştamm da koronavirusun digər növləri kimi adi PCR test üsulu ilə aşkarlanır.

“Çünki mövcud testlər istənilən ştammda müsbət nəticə verməyə qadirdir. Sadəcə həmin ştammın hansı növ olmasını laborator analizlər nəticəsində dəqiq bilmək olur”.

Mövsümü virusa yoluxanlardan götürülən test nəticələrinin neqativ çıxması bir daha sübut edir ki, həmin nümunələrdə "COVID-19" virusu yoxdur”, - o vurğulayıb.

Tibbi Ərazi Bölmələrini İdarəetmə Birliyinin (TƏBİB) İnfeksion xəstəliklər üzrə işçi qrupunun həkim-infeksionisti Nəzrin Mustafayeva isə “Report”a bildirib ki, əhali arasında yanlış fikir yayılıb ki, hazırda ölkədə yeni virus peyda olub və testlər bunu aşkar edə bilmir: "Bu, tamamilə yanlış düşüncədir. Koronavirusun bütün ştammları istər "Alfa", "Beta", "Delta", istərsə də "Omikron" COVID-19 PCR testində müsbət göstərir. Amma bu test hansı ştam olmasını fərqləndirə və təyin edə bilmir. Ştammın növünü təyin etmək üçün isə əlavə laborator analizə ehtiyac olur. "COVID-19" PCR testi neqativ olan xəstələr böyük ehtimal digər respirator viruslardan birinə yoluxmuş hesab olunurlar. Bunlar arasında uzun müddət davam edən, daha çox ağırlaşmalara və bakterial koinfeksiyalara meyilli olan növ “influenza”dır”.

Qeyd edək ki, Səhiyyə Nazirliyi, İcbari Tibbi Sığorta üzrə Dövlət Agentliyi və Tibbi Ərazi Bölmələrini İdarəetmə Birliyinin birgə yaydığı məlumata görə aparılan araşdırmaların növbəti mərhələsində ölkə xaricindən gələn şəxslərdən götürülən nümunələrdən 12 -də SARS-CoV-2 21K “Omikron” variantı aşkarlanıb.

Demokrat.az

DİGƏR XƏBƏRLƏR

XƏBƏR LENTİ
Top