Azərbaycanın futbol üzrə milli komandasının baş məşqçisi Canni De Byazi DÇ-2022-nin seçmə mərhələsi çərçivəsində Lüksemburqa səfər oyunu öncəsi fikirlərini bölüşüb.
Demokrat.azxəbər verir ki, mütəxəssis mətbuat konfransında sabahkı qarşılaşma üçün əllərindən gələni edəcəklərini diqqətə çatdırıb: “Sabah qrupda 3-cü oyunumuza çıxacağıq. Çox vacib qarşılaşmadır. Hazırda xalımız yoxdur. Əlimizdən gələni edəcəyik. Fikirləşirəm ki, yaxşı oyun göstərəcəyik”. De Byazi start heyəti müəyyənləşdirdiyini də bildirib: "Sabah meydana ən yaxşı və ən hazırlıqlı futbolçular çıxacaq. Az müddətdə 3 vacib görüş keçirəcəyik. Yaxşı başlamaq istəyirik". De Byazinin sözlərinə görə, komandası ilk növbədə istəkli olmalıdır: "Bunun üzərində işləmişik. Komandamız getdikcə daha da inkişaf edir. Rəqibin heyətində xeyli sayda legioner var. Gözəl meydançada oynayacağıq. İnanıram ki, qalib gələn tərəf biz olacağıq". Təcrübəli baş məşqçi hücum xəttində kimə şans verəcəyini açıqlamayıb: "İstərdim ki, bütün futbolçularım əllərindən gələni etsin. 5 əvəzetmə haqqımız var. Kimlər fiziki cəhətdən çatdırmasa, əvəzlənəcək". De Byazi deyib ki, vaxt komandanın daha yaxşı çıxış etməsi üçün çox kömək ola bilər: "Bir gündə hər şeyi dəyişmək olmaz. Artıq daha çox inanmağa başlayırıq. Komanda meydanda xarakter göstərsə, qalib gələ bilərik. Yaxşı kollektivimiz var. Futbolçularıma inanıram". Qeyd edək ki, sentyabrın 1-də Lüksemburq stadionunda oynanılacaq qarşılaşma Bakı vaxtı ilə saat 22:45-də başlayacaq.
