Avqustun 14-də “Wizz Air Abu Dabi” aviaşirkəti ilk Abu-Dabi–Bakı reysini yerinə yetirib.
Demokrat.az xəbər verir ki, “Airbus321-100” markalı təyyarə Bakı vaxtı ilə saat 21:10-da Heydər Əliyev Beynəlxalq Aeroportuna eniş edib.
Təyyarə ənənəvi olaraq su arkası ilə qarşılanıb.
Bir tərəfə uçuş bileti 10-20 avrodan başlayır. Ən ucuz bileti heç bir yük və əlavə xidmətlər olmayan uçuşa görə əldə etmək mümkündür. Amma təyyarədə yerlər tutulduqca qiymətlər artır.
Belə ki, sentyabrın 18-i Bakıdan Abu-Dabiyə, 25-i isə əks istiqamətdə ən ucuz biletlərin qiyməti müvafiq olaraq 30 avro və 15 avrodur. Bu reyslərə standart bilet müvafiq olaraq 76 avro və 62 avro, bütün xidmətlərin daxil olduğu «full» bilet isə 100 avro və 85 avro arasındadır.
Ən maraqlısı odur ki, bu şirkət vasitəsilə Abu-Dabidən keçməklə ucuz qiymətə Budapeştə də uçmaq mümkündür.
Qeyd edək ki, Birləşmiş Ərəb Əmirliklərinə məxsus “Wizz Air Abu Dabi” aviaşirkəti həftədə iki dəfə - çərşənbə axşamı və şənbə günü Bakıya uçuşlar həyata keçirəcək. Biletləri “wizzair.com” saytından əldə etmək mümkündür.
Demokrat.az
