YapiKredi Müraciət Forması
Mazda CX-5
Maraqlı Özəl

Qış gödəkçəsini necə yumaq lazımdır? - Vacib qaydalar

Qış gödəkçəsini necə yumaq lazımdır? - Vacib qaydalar

Qış mövsümünün yaxınlaşması ilə qalın gödəkçələrin yuyulması məsələsi aktuallaşır. Lakin yanlış yuma və qurutma qaydaları geyimin içindəki dolğunun topalanmasına, formasını itirməsinə və istifadəyə yararsız hala düşməsinə səbəb ola bilər.

Demokrat.az xəbər verir ki, bu barədə "Infobae" məlumat yayıb.

Mütəxəssislər bildirirlər ki, gödəkçəni yumazdan əvvəl ilk növbədə onun üzərindəki etiketə diqqət yetirmək lazımdır. Çünki zahirən oxşar görünən geyimlərin yuyulma və qulluq qaydaları fərqli ola bilər.

Etiketdə su dolu qab işarəsi geyimin paltaryuyan maşında yuyula biləcəyini göstərir. İşarənin altında iki xətt varsa, zərif yuma rejimindən istifadə edilməlidir. Üzərindən xətt çəkilmiş simvol isə maşında yumanın qadağan olduğunu bildirir. Həmçinin etiketdə icazə verilən maksimum su temperaturu da göstərilə bilər.

Əgər gödəkçənin maşında yuyulmasına icazə verilirsə, ən aşağı temperaturun seçilməsi və sıxma rejiminin söndürülməsi tövsiyə olunur.

Gödəkçəni maşında yumağın mərhələləri:

1. İlk növbədə cibləri boşaldın, çıxarıla bilən detalları ayırın və bütün fermuarları bağlayın.
2. Parça üzərində ləkələr varsa, əvvəlcədən ləkəçıxarıcı vasitə tətbiq edin. Məhsulu istifadə etməzdən əvvəl geyimin görünməyən kiçik hissəsində yoxlamaq məsləhətdir.
3. Gödəkçəni tərs üzünə çevirin.
4. Paltaryuyan maşında ən aşağı temperaturu və zərif yuma rejimini seçin. Sıxma funksiyasını söndürün.
5. Yuma zamanı yalnız maye yuyucu vasitələrdən istifadə edin. Quru toz və yumşaldıcı vasitələrdən uzaq durun.

Yuma prosesi başa çatdıqdan sonra qurutma qaydalarına da əməl etmək vacibdir. Əgər etiketdə icazə verilirsə, gödəkçəni quruducu maşında aşağı temperaturda qurutmaq olar. Bu zaman barabana üç-dörd ədəd rezin və ya silikon top yerləşdirmək tövsiyə edilir. Onlar dolğunun bir yerə yığılmasının qarşısını almağa kömək edir. Geyim tam qurumayıbsa, qurutma prosesi təkrarlana bilər.

Əl ilə yumaq lazım gəldikdə gödəkçəni sərin su və yuyucu vasitə olan qaba yerləşdirərək 15-30 dəqiqə saxlamaq lazımdır. Daha sonra parçanı ehtiyatla yumaq, bir neçə dəfə yaxalamaq və güclü sıxmadan suyunu çıxarmaq məsləhət görülür.

Mütəxəssislər qurudulma zamanı da diqqətli olmağı tövsiyə edirlər. Gödəkçənin tam quruduğundan əmin olmaq lazımdır. Parçanın daxilində nəm qalan hissələr kif yaranmasına səbəb ola bilər.

Qeyd olunur ki, bütün bu qaydalar yalnız geyimin istehsalçısı tərəfindən icazə verilən qulluq üsullarına uyğun tətbiq edilməlidir.