Ağ yataq dəstləri zaman keçdikcə sarımtıl rəng ala bilər. Bunun əsas səbəbi yuxu zamanı parçaya hopan tər, dərinin təbii yağları və saç üçün istifadə olunan vasitələrdir. Lakin bu ləkələri təmizləmək üçün mütləq ağardıcıdan istifadə etmək lazım deyil.
Demokrat.az xəbər verir ki, bu barədə Ziare.com yazıb.
Təmizlik üzrə mütəxəssis, ABŞ-ın Kentukki ştatında fəaliyyət göstərən "Super Cleaning Service Louisville" şirkətinin əməliyyat meneceri Elizabet Şilds saralmış yastıq üzlərini təmizləmək üçün ferment əsaslı yuyucu vasitələrdən istifadə etməyi tövsiyə edir.
Onun sözlərinə görə, sarı ləkələrin əksəriyyəti üzvi mənşəli maddələrdən – tərdən, dəri yağlarından və saç vasitələrinin qalıqlarından yaranır. Ferment tərkibli yuyucu vasitələr isə bu cür çirkləri parçalamağa kömək edir.
Şilds əvvəlcə yastıq üzlərini bir gecə ilıq suda islatmağı məsləhət görür. Bunun üçün suya ferment tərkibli yuyucu toz əlavə edilməli, parçalar səhərə qədər həmin qarışıqda saxlanılmalıdır. Daha sonra yastıq üzləri yaxalanmalı və paltaryuyan maşında yuyulmalıdır.
Mütəxəssis maşında yuma zamanı isti su rejimini və adi, yaxud çox çirkli paltarlar üçün nəzərdə tutulan proqramı seçməyi tövsiyə edir. Əlavə təmizləyici təsir üçün kondisioner bölməsinə yarım stəkan ağ sirkə tökmək də mümkündür.
Əgər yuyulmadan sonra parçada sarımtıl çalar qalarsa, onun ağ görünüşünü bərpa etmək üçün çox az miqdarda mavi piqmentdən istifadə oluna bilər.
Məqalədə həmçinin xəbərdarlıq edilir ki, xlorlu ağardıcılar bu cür ləkələrin təmizlənməsində həmişə effektiv olmur. Tər və dəri yağlarının tərkibindəki zülallarla kimyəvi reaksiyaya girərək ləkələrin parçaya daha möhkəm hopmasına və tündləşməsinə səbəb ola bilər. Bundan başqa, aqressiv kimyəvi maddələr parçanın liflərinə zərər verə bilər.
