Donuz ətindən adətən kotlet və döyülmüş ət hazırlansa da, ondan daha fərqli və iştahaaçan yemək də bişirmək mümkündür. Pendir və turşu xiyarla hazırlanan ət ruletləri həm gündəlik süfrə, həm də qonaqlıq üçün uyğun seçimdir. Sobada bişirildiyi üçün bu yemək tavada qızardılan adi kotletlərdən fərqli olaraq daha az yağ çəkir.
Demokrat.az xəbər verir ki, UNIAN nəşri bu yeməyin reseptini təqdim edib.
Lazım olan ərzaqlar:
- 250 qram donuz əti;
- 4 xörək qaşığı acı xardal;
- 50 qram pendir;
- 1 böyük və ya 2 kiçik turşu xiyar;
- Duz, istiot və zövqə uyğun ədviyyatlar;
- 1 xörək qaşığı bitki yağı.
Hazırlanma qaydası
Əvvəlcə ət hər iki tərəfdən yaxşıca döyülür, duz və istiot əlavə edilir. Daha ləzzətli olması üçün soyuducuda 2-3 saat marinad edilməlidir. Bu mərhələni keçmək də mümkündür.
Sobanın temperaturu 180 dərəcəyə çatdırılır. Ətin bir tərəfinə nazik qatla xardal çəkilir. Pendir və turşu xiyar nazik zolaqlar şəklində doğranaraq ət dilimlərinin kənarına yerləşdirilir. Daha sonra dilimlər rulet formasında bükülür və dağılmaması üçün diş çöpü və ya sapla bərkidilir.
Ruletlər əvvəlcə tavada bitki yağı ilə hər tərəfi 2-4 dəqiqə olmaqla qızardılır. Bu üsul onların sobada daha iştahaaçan qızılı rəng almasına kömək edir. Ardınca ruletlər soba sinisinə düzülür və ölçüsündən asılı olaraq 30-45 dəqiqə bişirilir.
Resepti fərqli içliklərlə də hazırlamaq mümkündür. Bunun üçün pendir və turşu xiyar əvəzinə göbələk, qara gavalı və ya vetçinadan istifadə edilə bilər. Daha doyumlu yemək istəyənlər isə ruletləri sobaya qoymazdan əvvəl bekonla da bükə bilərlər.
