Ermənistan parlamentindəki terror aktından 27 il keçir. Ermənistanda 1999-cu ildə parlamentə edilmiş hücumun qurbanlarının xatirəsi anılıb.
Demokrat.az xəbər verir ki, çərşənbə axşamı Ermənistan parlamenti 27 oktyabr 1999-cu ildə baş vermiş terror hücumu qurbanlarının xatirəsini bir dəqiqəlik sükutla yad edib.
"Düz 27 il əvvəl, bu gün, elə bu salonda, Milli Assambleyanın o vaxtkı sədri, sədr müavinləri, baş nazir, hökumət üzvü və bir neçə deputat terror hücumu nəticəsində həlak oldular. Bu cinayət əməli qurbanlarının xatirəsini anmaq üçün bir dəqiqəlik sükutla yad etməyi təklif edirəm", – deyə Ermənistan parlamentinin sədr müavini Ruben Rubinyan terror qurbanlarını anarkən bildirib.
Terror aktı haqqında
1999-cu il oktyabrın 27-də Nairi Hunanyanın başçılıq etdiyi bir qrup terrorçu Ermənistan Milli Məclisinin iclas zalına soxularaq, orada olan respublika parlamenti və hökumətinin rəhbərlərinə, eləcə də üzvlərinə yaxın məsafədən atəş açıb.
Terror hücumu nəticəsində aşağıdakı şəxslər həlak olublar: Ermənistan Milli Məclisinin sədri və Milli Qəhrəman Karen Dəmirçiyan; Ermənistan Respublikasının Baş naziri və Milli Qəhrəman Vazgen Sarkisyan; parlament sədrinin müavinləri Yuri Baxşyan və Ruben Miroyan; parlament üzvü və Artsax müharibəsi qəhrəmanı Armenak Armenakyan; parlament üzvləri Mikael Kotanyan və Henrik Abrahamyan; həmçinin operativ məsələlər üzrə nazir Leonard Petrosyan.
Hücum edənlərin məhkəmə prosesi 2001-ci ildən 2003-cü ilə qədər davam etdi. İttiham tərəfi ən ağır cəzanın tətbiqini tələb edirdi, lakin 2003-cü ilin avqustunda qüvvəyə minən Ermənistanın yeni Cinayət Məcəlləsindən ölüm cəzası çıxarılmışdı.
Bu günə olan məlumata görə, işdə iştirak edən əsas şəxslərin taleyi belədir:
Cəza çəkənlər
- Nairi Unanyan (terrorçu qrupun lideri) - "İrəvan-Mərkəz" (Yerevan-Kentron) penitensiar müəssisəsində ömürlük həbs cəzasını çəkməyə davam edir. 2019-cu ildə o, şərti olaraq vaxtından əvvəl azadlığa buraxılmaq üçün müraciət etsə də, onun müraciəti Ədliyyə Nazirliyi tərəfindən qəti şəkildə rədd edilib.
- Karen Unanyan (Nairinin kiçik qardaşı) - ömürlük həbs cəzasını çəkir.
- Derenik Bejanyan - ömürlük həbs cəzasını çəkir.
- Aşot Knyazyan - ömürlük həbs cəzasını çəkirdi; o, 2024-cü ilin avqust ayında həbsxanada vəfat edib.
Həbsdə olarkən şübhəli şəkildə ölən terrorçular
- Norayr Yeğiazaryan (terorçulara silah satmaqda ittiham olunan qrupun üzvü) - 2000-ci ildə, məhkəmə hökmü çıxarılmazdan əvvəl, həbs kamerasında elektrik cərəyanı vurması nəticəsində vəfat edib.
- Vram Qalstyan (Unanyan qardaşlarının əmisi; ömürlük həbs cəzasına məhkum edilmişdi) - 2004-cü ildə həbsxanada vəfat edib (rəsmi məlumata görə, o, intihar edib).
- Hamlet Stepanyan (14 il müddətinə azadlıqdan məhrum edilmiş yeganə şəxs) - 2010-cu ilin may ayında, cəza müddətinin bitməsinə az qalmış, həbsxanada ürək tutmasından vəfat edib.
- Eduard Qriqoryan (ömürlük həbs cəzasına məhkum edilmişdi) - 2017-ci ilin noyabr ayında tibb mərkəzində, ürək problemləri səbəbindən vəfat edib.
Xatırladırıq ki, bu qanlı hadisə Qarabağ separatçılarının Ermənistandakı hakimiyyəti ələ keçirməsindən sonra, Robert Koçaryanın hakimiyyəti dövründə və birbaşa onun əmri ilə həyata keçirilib.
Başda Karen Dəmirçiyan olmaqla Qrabağ klanına qarşı İrəvanda ciddi bir qüvvə formalaşmışdı. Bu qüvvə separatçıların Ermənistanı gələcəkdə hansı uçuruma apardığını gözəl görürdü və onlardan ölkənin canını qurtarmağa çalışırdı. Parlament seçkilərini böyük fərqlə udan Ermənistan SSR KP-nın keçmiş birinci katibi Karen Dəmirçiyan və komandası hökumət formalaşdırmaq və prezidentin (Robert Köçəryanın - red.) səlahiyyətlərini məhdudlaşdırıb onun separatçı komandasını hakimiyyətdən uzaqlaşdırmağa çalışırdı.
Təhlükənin artdığını hiss edən Köçəryan xaricdən onu idarə edən mərkəzlərin təlimatı ilə Dəmirçiyan və yaxın ətrafını 1999-cu il 27 oktyabr tarixində elə parlament iclası zamanı vəhşicəsinə qətlə yetirtdi. Cinayət işinin bağlanmasına və qrupun üzvlərinin məhkum olmasına baxmayaraq, ölənlərin yaxınları və Ermənistan ictimaiyyəti bu terror aktının arxasında Köçəryanın durduğunu gözəl bilir. Zaman-zaman ən tanınmış erməni siyasətçiləri və hüquq müdafiəçiləri konkret olaraq cinayətin Moskvada planlandığı fikrini belə açıq şəkildə səsləndirərək Dəmirçiyan və komandasının məhv edilməsinin məhz Kremlin işinə yaradığını bildiriblər. Çünki bu hadisədən sonra başsız və lidersiz qalmış erməni müxalifəti 20 ildən də çox bir müddətdə Qarabağ klanını yerindən tərpədə bilmədi və ölkə tam olaraq Rusiyanın "for post"u vəziyyətinə düşdü.
Müəllif: Alparslan
