Çiy ət və quş əti dondurucuda uzun müddət saxlanıla bilər. Lakin məhsulun təhlükəsiz qalması onun dadını və keyfiyyətini eyni müddət ərzində qoruyacağı demək deyil. Mütəxəssislər ətin növünə və formasına uyğun saxlama müddətinə diqqət yetirməyi tövsiyə edirlər.
Demokrat.az-ın "Martha Stewart" portalına istinadən verdiyi məlumata görə, ət mənfi 18 dərəcə və ya daha aşağı temperaturda fasiləsiz saxlanıldıqda təhlükəsizliyini qeyri-məhdud müddət ərzində qoruya bilər. Bununla belə, uzun müddət dondurucuda qalan məhsul nəmliyini itirə, rəngi və teksturası dəyişə, dadı isə pisləşə bilər.
Ətin növünə görə saxlama müddətləri
- Qiymə: Mal, donuz, quzu və quş ətindən hazırlanmış çiy qiymənin keyfiyyətini qoruması üçün tövsiyə olunan müddət 3-4 aydır.
- Kolbasa məhsulları: Çiy kolbasa növlərini dondurucuda 1-2 aydan artıq saxlamaq məsləhət görülmür.
- Steyk və doğranmış ət: Mal, donuz, quzu və dana ətindən hazırlanan steyk, kotletlik dilimlər və iri tikələr 4-12 ay ərzində istifadə edilməlidir. Nazik tikələr üçün 4-6 aylıq müddət daha münasibdir.
- Qabırğa: Donuz və mal əti qabırğaları dondurucuda 4-12 ay saxlanıla bilər.
- Bütöv toyuq və hinduşka: Bu məhsulların keyfiyyətini qorumaq üçün tövsiyə olunan müddət 12 aya qədərdir.
- Toyuq və hinduşkanın hissələri: Döş əti, bud, qanad və digər hissələr 9 aya qədər saxlanıla bilər.
Mütəxəssislər bildirirlər ki, qiymə və doğranmış ətin hava ilə təmas edən səthi daha geniş olduğundan bu məhsulların dadı və keyfiyyəti daha tez dəyişə bilər. Ətdəki yağların oksidləşməsi də xoşagəlməz dadın yaranmasına səbəb olur.
Əti dondurucuda necə saxlamaq lazımdır?
Məhsulun keyfiyyətini mümkün qədər uzun müddət qorumaq üçün onu hava keçirməyən qablaşdırmada saxlamaq vacibdir. Vakuum qablaşdırma bu baxımdan ən effektiv üsullardan biri hesab olunur. Belə imkan olmadıqda ətin səthinə qida plyonkası sıx şəkildə çəkilə, daha sonra qalın folqaya və ya dondurucu üçün nəzərdə tutulan paketə yerləşdirilə bilər. Paketdəki artıq havanı çıxarmaq tövsiyə olunur.
Dondurucuda düzgün qablaşdırma ətin qurumasının və səthində "donma yanığı" adlanan rəng və tekstura dəyişikliklərinin yaranmasının qarşısını almağa kömək edir.
Qeyd edək ki, göstərilən müddətlər əsasən məhsulun keyfiyyətini qorumaq üçün nəzərdə tutulub. Ətin təhlükəsizliyi onun dondurulmazdan əvvəlki vəziyyətindən və saxlama şəraitindən də asılıdır. Əti soyuducuda əridib bişirmək, otaq temperaturunda uzun müddət saxlamamaq tövsiyə olunur.
Jalə
