Dünyanın müxtəlif ölkələrində yerli mətbəxin ayrılmaz hissəsi sayılan, lakin turistlərə olduqca qəribə və hətta iyrənc görünə bilən yeməklər var. Onların bəziləri xüsusi fermentasiya üsulları ilə hazırlanır, bəzilərində isə heyvan orqanlarından və həşəratlardan istifadə olunur.
Demokrat.az xəbər verir ki, bu yeməklər yerli insanlar üçün qeyri-adi hesab edilməsə də, onları ilk dəfə görənlər üçün ciddi təəccüb yarada bilər.
Dünyanın ən qəribə yeməklərindən TOP-10
Blodpalt – qanlı xəmir kündələri
İsveçin şimalında və Finlandiya Laplandiyasında məşhur olan bu yemək un və ev heyvanlarının qanından hazırlanır. Xəmir bir gecə saxlanıldıqdan sonra kündələr formasına salınır və ət bulyonunda bişirilir. Yemək adətən ət, kərə yağı və ya meşə giləmeyvəsi ilə təqdim olunur.
Svið – qoyun başı
İslandiyanın ənənəvi yeməklərindən biri olan Svið bütöv qoyun başından hazırlanır. Başın yunu təmizlənir, ortadan iki yerə bölünür, duzlanır və daha sonra qaynadılır. Yemək göz və dişlərlə birlikdə süfrəyə verilə bilər. Dil və gözlər isə ayrıca delikates hesab olunur.
Haggis – qoyun içalatı
Şotlandiyanın məşhur yeməyi olan haggis qoyunun ürəyi, qaraciyəri və ağciyərlərinin yulaf, soğan, piy və ədviyyatlarla qarışdırılması ilə hazırlanır. Qarışıq təmizlənmiş qoyun mədəsinə doldurulur və bir neçə saat bişirilir.
Huitlacoche – “Meksika trüfü”
Bu Meksika delikatesi göbələk xəstəliyinə yoluxmuş qarğıdalıdan hazırlanır. Qarğıdalının dənələrində yaranan boz rəngli şişkin hissələr yığılır, soğan və bibərlə qızardılır və tako, kesadilya kimi yeməklərin içliyində istifadə edilir.
Hákarl – fermentləşdirilmiş köpəkbalığı
İslandiyada yeyilən Hákarl Qrenlandiya köpəkbalığının ətindən hazırlanır. Təzə halda zəhərli hesab edilən ət xüsusi üsulla fermentasiya edilir və daha sonra aylarla qurudulur. Buna baxmayaraq, yemək özünəməxsus kəskin ammonyak qoxusunu saxlayır.
Balut – embrionlu ördək yumurtası
Filippin mətbəxinin ən məşhur qeyri-adi yeməklərindən biridir. Ördək yumurtası 14-21 gün inkubasiya edilir və içərisində artıq formalaşmış embrion olduqda qaynadılır və ya qızardılır. Adətən isti halda qabığında təqdim edilir.
Əvvəlcə yumurtanın içindəki maye içilir, daha sonra isə yumurtanın qalan hissəsi duz və qara istiotla yeyilir.
Kiviaq – suitinin bədənində fermentləşdirilən quşlar
Qrenlandiyanın ənənəvi yeməyi olan kiviaq kiçik dəniz quşlarından hazırlanır. Quşlar bütöv halda yeni kəsilmiş suitinin dərisindən hazırlanmış kisəyə yerləşdirilir. Üzəri yağla örtülür və bir neçə ay daşların altında saxlanılaraq fermentasiya edilir.
Daha sonra quşlar çıxarılır, təmizlənir və əlavə bişirilmədən yeyilir.
Casu marzu – canlı sürfəli pendir
Sardiniyaya məxsus bu pendir hazırlanma üsuluna görə dünyanın ən qeyri-adi delikateslərindən sayılır. Pendir milçəyinin sürfələri xüsusi olaraq pendirə yerləşdirilir və onların fəaliyyəti pendir kütləsinin parçalanmasını sürətləndirir.
Əsasən pecorino pendirindən hazırlanan Casu marzunun fərqləndirici xüsusiyyəti onun içərisində canlı sürfələrin olmasıdır.
Mənbədə qeyd olunan siyahının digər iki yeməyi də oxşar şəkildə müxtəlif ölkələrin ənənəvi, lakin xarici turistlər üçün olduqca qeyri-adi delikatesləri sırasına daxildir.
Jalə Demokrat.az
