Qəfil yaranan şokolad istəyi hər zaman sadə şirniyyat həvəsi olmaya bilər. Nevrologiya mütəxəssisi dosent doktor Demet Aygün bildirib ki, miqren tutması baş ağrısından bir neçə saat əvvəl özünü göstərə bilər. Onun sözlərinə görə, həddindən artıq əsnəmə, halsızlıq, tez-tez sidiyə getmə və müəyyən qidalara güclü istək yaxınlaşan miqren tutmasının xəbərçisi ola bilər.
Miqren sinir sisteminə təsir edən nevroloji xəstəlik hesab olunur. Xəstəlik zamanı zonklayıcı baş ağrısı ilə yanaşı, ürəkbulanma, işığa və səsə həssaslıq, yorğunluq və diqqət çətinliyi də müşahidə edilə bilər. Bəzi tutmalar bir neçə saat davam etdiyi halda, bəzi insanlarda gündəlik həyata günlərlə təsir edən əlamətlərə səbəb ola bilər.
İlk əlamət həmişə baş ağrısı olmur
Mütəxəssis qeyd edib ki, miqren tutmasının ilk əlaməti hər zaman ağrı olmaya bilər. Bəzi insanlarda baş ağrısından bir neçə saat və ya bir gün əvvəl həddindən artıq əsnəmə, yuxululuq, narahatlıq, halsızlıq, tez-tez sidiyə getmə və diqqət dağınıqlığı meydana çıxa bilər.
Bu mərhələ “prodrom” adlanır və yaxınlaşan miqren tutmasının erkən mərhələsi hesab edilə bilər.
Şokolad istəyi də xəbərdarlıq ola bilər
Şokoladın miqreni tətik etdiyi geniş yayılmış fikir olsa da, əlaqə hər zaman bu qədər sadə deyil. Dosent doktor Demet Aygünün sözlərinə görə, bəzi insanlarda şokolad istəyi miqreni başladan səbəb deyil, artıq başlamış miqren prosesinin əlaməti ola bilər.
Yəni insan şokolad yediyi üçün miqren tutması keçirməyə bilər. Əksinə, yaxınlaşan tutma səbəbindən şokolad yemək istəyi yarana bilər. Bununla belə, hər şokolad istəyinin miqren əlaməti olmadığı da vurğulanır.
Aura əlamətlərinə diqqət
Miqren xəstələrinin bir hissəsində baş ağrısından əvvəl “aura” adlanan müvəqqəti nevroloji əlamətlər ortaya çıxa bilər. İşıq çaxmaları, görmə sahəsində dəyişikliklər, üzdə və ya qollarda keyimə, danışmaqda çətinlik aura əlamətləri arasında yer alır.
Əgər daha əvvəl heç yaşanmamış yeni nevroloji əlamətlər ortaya çıxarsa, onları birbaşa miqrenlə əlaqələndirmək olmaz və tibbi müayinədən keçmək lazımdır. Tətikləyici amillər insandan insana dəyişir
Miqren tutmalarının yaranmasında şəxsi tətikləyicilər mühüm rol oynayır. Yuxusuzluq, normadan artıq yatmaq, yemək ötürmək, kifayət qədər maye qəbul etməmək, güclü stress və kofeini qəfil dayandırmaq bəzi insanlarda tutmanı asanlaşdıra bilər.
Xüsusilə isti havalarda maye itkisi artdığı üçün müntəzəm su qəbul etmək vacibdir.
Mütəxəssislər miqreni tətikləyən amillərin insandan insana dəyişdiyini bildirirlər. Buna görə də problemin səbəbini yalnız bir qidanın və ya vərdişin üzərinə atmaq düzgün yanaşma olmaya bilər.
Baş ağrısının nə vaxt başladığını, ondan əvvəl hansı əlamətlərin müşahidə edildiyini, qəbul edilən qidaları, yuxu rejimini və stress səviyyəsini qeyd etmək insanın öz miqren tutmalarının qanunauyğunluğunu müəyyənləşdirməsinə kömək edə bilər.
Ağrıkəsicilərdən nəzarətsiz istifadə risklidir
Miqreni hər dəfə yalnız ağrıkəsici ilə aradan qaldırmağa çalışmaq da problem yarada bilər. Dosent doktor Aygün nəzarətsiz və tez-tez ağrıkəsici istifadəsinin zamanla baş ağrılarının daha sıx və davamlı hala gəlməsinə səbəb ola biləcəyini qeyd edib.
Leyla Demokrat.az
