Siciliyada italiyalı dalğıc təxminən 45 metr dərinlikdə yüzlərlə qədim amforanın bir yerdə toplandığını aşkar edib. Qalıqların təxminən 2 min il əvvəl Roma dövründə batmış gəminin qalıqları olduğu güman edilir.
Demokrat.az xəbər verir ki, italiyalı dalğıc və nizə ilə balıq ovu üzrə çempion Cakomo de Mola Siciliya sahillərində növbəti kəşfiyyatı zamanı qədim gəmi qəzasının izlərinə rast gəlib. İtaliya Mədəniyyət Nazirliyi bu tapıntını "son illərin ən mühüm sualtı arxeoloji kəşflərindən biri" adlandırıb.
Dalğıc köməkçisi ilə birlikdə Siciliyanın cənub-qərbindəki Mazara del Vallo sahilindən təxminən 3 mil məsafədə araşdırma apararkən sonar cihazı əvvəlcə qaya hesab etdiyi sualtı obyekt aşkarlayıb.
Görünüş məsafəsinin aşağı olmasına baxmayaraq, de Mola araşdırmanı davam etdirib və qədim yunanlar, romalılar və finikiyalılar tərəfindən malların saxlanması və daşınması üçün istifadə edilən qulplu gil qablar – amforalara çatıb.
Dalğıc sosial şəbəkələrdə paylaşdığı videoda tapıntını həyatının ən inanılmaz kəşfi adlandırıb.
De Mola əksəriyyəti hələ də salamat qalan əşyalar yığınını "dənizin dibində xəzinə" kimi təsvir edib. Əraziyə baxış keçirən səlahiyyətlilər də amforaların tarixi baxımdan mühüm kəşf olduğunu təsdiqləyiblər.
İtaliyanın mədəniyyət naziri Alessandro Culi şənbə günü bildirib ki, yeni aşkar edilmiş sualtı arxeoloji ərazi böyük ehtimalla təxminən 2 min il əvvəl Roma dövründə baş vermiş gəmi qəzasına aiddir.
Culi qeyd edib ki, arxeoloji konteksti bərpa etmək məqsədilə İtaliya rəsmiləri ərazidə araşdırmaları davam etdirəcəklər. Yüzlərlə amfora ilə yanaşı, iki qurğuşun lövbər gövdəsi də aşkar edilib.
İki qulplu, dar boğazlı və enli gövdəli qablar olan amforalardan qədim Aralıq dənizi sivilizasiyalarında zeytun, zeytun yağı, şərab, bal və taxıl kimi məhsulların saxlanması və daşınması üçün istifadə olunurdu.
Jalə Demokrat.az
