Yay aylarında hovuz istifadəsinin artması ilə qulaq infeksiyalarında da artım müşahidə olunur. Mütəxəssislər hovuzdan sonra qulaqda qalan suyu çıxarmaq üçün qulaq çöpü və ya müxtəlif əşyalardan istifadə etməyin sağlamlıq üçün risk yarada biləcəyini bildirirlər.
Qulaq-Burun-Boğaz mütəxəssisi Dos. Dr. İsmail Aytaç hovuzdan çıxdıqdan sonra qulağa daxil olan suyu çıxarmaq məqsədilə qulaq çöpü, salfet, saç sancağı və digər əşyaların istifadəsinin düzgün olmadığını açıqlayıb.
Onun sözlərinə görə, bu cür müdaxilələr qulaq kanalının təbii qoruyucu qatına zərər verə, infeksiya riskini artıra bilər. Həmçinin qulaq kirinin xaricə çıxmasına mane olaraq daha dərinə itələnməsinə səbəb ola bilər.
Qulaqdakı su hər zaman təhlükə demək deyil
Mütəxəssis bildirib ki, hovuzdan sonra qulaqda su qalması hər zaman ciddi problemə işarə etmir. Qulağın təbii şəkildə qurumasına imkan vermək daha doğru yanaşmadır.
Su düşən qulağın tərəfinə başı əymək və qulaq məməsini yüngül şəkildə aşağı çəkmək suyun çıxmasına kömək edə bilər. Uşaqlar üçün daha diqqətli olmaq lazımdır
Dos. Dr. Aytaç uşaqların xarici qulaq yollarının böyüklərə nisbətən daha həssas olduğunu vurğulayıb. O, valideynlərə hovuzdan sonra uşaqların qulaqlarına qulaq çöpü və ya başqa yad əşyalarla müdaxilə etməmələri barədə xəbərdarlıq edib.
Qulaqda davam edən ağrı, qaşınma, axıntı və ya eşitmə problemi olduqda həkimə müraciət etmək tövsiyə olunur.
Qulağın içini təmizləməyə çalışmaq məsləhət görülmür
Mütəxəssislərin fikrincə, hovuzdan sonra qulağın yalnız xarici hissəsini təmiz dəsmalla yumşaq şəkildə qurulamaq kifayətdir. Qulağın içinə müdaxilə etmədən onun təbii quruma prosesinə imkan vermək infeksiya riskinin azalmasına kömək edir.
Leyla Demokrat.az
