“İnşaatçı-Av Group” Məhdud Məsuliyyətli Cəmiyyət cərimə edilib.
Demokrat.az Yurd.Media-ya istinadən xəbər verir ki, MMC tərəfindən 53 930 ABŞ dolları məbləğində vəsait bank vasitəsilə 2024-cü ildə avans olaraq ölkə xaricinə köçürülüb.
“Azərbaycan Respublikasının rezidentlərinin xarici valyutada, habelə qeyrirezidentlərin milli və xarici valyutada əməliyyatlarının aparılması Qaydaları”nın 4.3.1.3-cü yarımbəndinin tələblərinə baxmayaraq, ödənişin aparıldığı gündən 2 il müddətində həmin məbləğdə vəsait hesabına alınan mallar ölkəyə idxal edilməyib və ya həmin məbləğdə valyuta vəsaiti geri qaytarılmayıb.
Mərkəzi Bank tərəfindən MMC-nin barəsində protokol tərtib edilib və iş baxılması üçün Sumqayıt Şəhər Məhkəməsinə göndərilib.
Məhkəmənin qərarı ilə MMC İnzibati Xətalar Məcəlləsinin 430.4-cü maddəsində nəzərdə tutulmuş inzibati xətanın törədilməsində təqsirli bilinib və inzibati xətanın obyekti olmuş vəsaitin 20 faizi məbləğində, yəni 10 786 ABŞ dolları məbləğində cərimə olunub.
Qeyd edək ki, hazırda “İnşaatçı-Av Group” MMC-nin dövlətə 385 min manat vergi borcu da yığılıb.
2023-cü ildə yaradılan şirkətin nizamnamə kapitalı 100 min manat, direktoru isə əvvəldən Yusubova Leyla Gülhəsən qızı olsa da bu il Nicat Muxtarovla əvəzlənib.
Demokrat.az
