Üzüm orqanizmin müxtəlif sistemlərinə müsbət təsir göstərən çoxsaylı faydalı maddələrlə zəngindir. O, ürək-damar sağlamlığını dəstəkləyə, antioksidantlarla təmin edə, yaddaşı gücləndirə və digər faydalar verə bilər.
Demokrat.az xəbər verir ki, bu barədə "Health" nəşri yazıb.
İctimai sağlamlıq üzrə magistr, həkim və dietoloq Sintiya Sass bildirib ki, ABŞ Kənd Təsərrüfatı Nazirliyinin məlumatına əsasən, bir stəkan üzümdə 124 kilokalori, 0,2 qram yağ, 3 milliqram natrium, 29 qram karbohidrat, 1,4 qram lif və 1,1 qram zülal var.
Bununla yanaşı, mütəxəssis bəzi insanlara üzümü ehtiyatla istehlak etməyi və ya ümumiyyətlə ondan imtina etməyi tövsiyə edib. Məsələn, üzümə allergiyası olan şəxslər bu məhsulu qəbul etməməlidirlər. Həmçinin həddindən artıq üzüm yemək tərkibindəki lif səbəbindən qaz, mədə spazmı kimi həzm problemlərinə səbəb ola bilər.
Diyetoloq üzümü qida rasionuna daxil etmək üçün 10 əsas səbəbi sadalayıb.
1.Çəkinin idarə olunmasına kömək edə bilər
Üzüm aşağı kalorili, lakin qida maddələri ilə zəngin məhsuldur və çəkinin idarə olunmasına dəstək ola bilər. Bir stəkan üzüm təxminən 124 kilokalori ehtiva edir. Tərkibindəki lif uzun müddət toxluq hissi yaradır və qanda şəkərin kəskin yüksəlməsinin qarşısını almağa kömək edir.
Sintiya Sass üzümü pendir kimi zülal və ya yağ mənbələri ilə birlikdə istehlak etməyi tövsiyə edir.
2.Qanda şəkərin səviyyəsini azaltmağa kömək edə bilər
Üzüm orta qlisemik indeksə malikdir və bu, diabetli insanlar üçün münasib hesab olunur.
Mütəxəssis üzümü alma, yulaf və ya kinoa kimi daha aşağı qlisemik indeksli məhsullarla, həmçinin zülal və ya yağ mənbələri ilə birlikdə qəbul etməyi məsləhət görür. Üzümdəki lif və antioksidantlar, xüsusilə resveratrol, insulinə həssaslığı artırmağa kömək edə bilər.
3.Ürək sağlamlığını dəstəkləyir
"Resveratrol" antioksidant və iltihabəleyhinə xüsusiyyətlərə malikdir. Araşdırmalar göstərir ki, bu maddə damarların sərtləşməsinin qarşısını almağa, insult və infarkt riskini azaltmağa, həmçinin arterial təzyiqi aşağı salmağa kömək edə bilər.
4.Orqanizmin su balansını qoruyur
Bir stəkan üzümdə təxminən 121 qram su var ki, bu da orqanizmin maye balansının qorunmasına kömək edir.
Kifayət qədər maye qəbulu orqanizmdən tullantıların xaric edilməsinə, normal bədən temperaturunun saxlanmasına, oynaqların qorunmasına və digər vacib funksiyalara xidmət edir.
5.Yaşlanma prosesini ləngidə bilər
Sintiya Sassın sözlərinə görə, bəzi tədqiqatlar resveratrolun yaşlanma prosesini yavaşlada biləcəyini göstərir.
Heyvanlar üzərində aparılan araşdırmalar bu maddənin maddələr mübadiləsini dəstəklədiyini və iltihabı azaltdığını göstərsə də, bu təsirin insanlarda təsdiqlənməsi üçün əlavə tədqiqatlara ehtiyac var.
6.Yaddaşı yaxşılaşdıra bilər
Araşdırmalar göstərir ki, üzümdə olan antioksidantlar diqqət və yaddaş da daxil olmaqla koqnitiv funksiyaların yaxşılaşmasına kömək edə bilər.
12 həftə davam edən bir araşdırmada üzüm əsaslı "Conigrape" əlavəsi qəbul edən iştirakçılarda yaddaş və diqqət göstəricilərinin yaxşılaşdığı müşahidə olunub.
7.Yuxu keyfiyyətini yaxşılaşdıra bilər
Üzüm az miqdarda melatonin ehtiva edir. Bu hormon yuxu-oyanıqlıq ritmini tənzimləyir və daha rahat yuxuya kömək edir.
Keyfiyyətli yuxu diabet, hipertoniya, piylənmə və insult kimi xəstəliklərin riskinin azalması ilə əlaqələndirilir.
8.Göz sağlamlığını qoruyur
Üzümün tərkibində olan lutein və zeaksantin görmə qabiliyyətini dəstəkləyir, parlaq işığın yaratdığı narahatlığı azaldır və yaşa bağlı sarı ləkə degenerasiyası ilə katarakta riskini aşağı sala bilər.
9.Sümükləri möhkəmləndirməyə kömək edir
Üzüm K vitamini, kalsium, maqnezium və kalium mənbəyidir. Bu maddələr sümük sağlamlığının qorunmasında mühüm rol oynayır və onların çatışmazlığı sınıq riskini artıra bilər.
10.İmmuniteti gücləndirə bilər
Bir stəkan üzüm təxminən 4,8 milliqram C vitamini ehtiva edir ki, bu da immun sisteminin normal fəaliyyəti üçün vacibdir.
Mütəxəssisin sözlərinə görə, üzümdə olan piqmentlər həm də antimikrob xüsusiyyətlərə malik ola bilər və bakteriya ilə viruslara qarşı qoruyucu təsir göstərə bilər.
