Yay aylarında ayaqqabıda yaranan xoşagəlməz qoxu ən narahatedici problemlərdən biridir. Mütəxəssislərin sözlərinə görə, bahalı sprey və xüsusi vasitələr almadan da bu problemin öhdəsindən gəlmək mümkündür.
Demokrat.az "TOP" nəşrinə istinadən xəbər verir ki, ayaqqabıdakı xoşagəlməz qoxunun əsas səbəbi isti və rütubətli mühitdə sürətlə çoxalan bakteriyalar və tərdir. Bu problem xüsusilə uzun müddət gəzən və ya idmanla məşğul olan insanlarda daha çox müşahidə olunur.
Mütəxəssislər ilk növbədə adi çay paketlərindən istifadə etməyi tövsiyə edirlər.
Hər ayaqqabının içinə bir ədəd quru qara və ya yaşıl çay paketi qoyaraq onu yaxşı havalanan yerdə bir gecə saxlayın. İstifadə olunan, yəni dəmlənmiş çay paketlərindən istifadə etmək olmaz. Çünki nəm paket ayaqqabının içərisini daha da rütubətləndirərək problemi ağırlaşdıra bilər.
Səhər çay paketlərini çıxardıqdan sonra ayaqqabıdakı qoxunun nəzərəçarpacaq dərəcədə azaldığı hiss olunacaq.
Alternativ üsullardan biri də qida sodasından istifadə etməkdir. Hər ayaqqabının içinə iki xörək qaşığı qida sodasını nazik pambıq kisəyə qoyaraq və ya birbaşa içliyin üzərinə səpərək gecə boyunca saxlamaq tövsiyə olunur. Səhər isə soda sadəcə təmizlənərək çıxarılır.
Qida sodası həm nəmi yaxşı sorur, həm də xoşagəlməz qoxuları neytrallaşdırır.
Əgər evdə qida sodası yoxdursa, ayaqqabının içinə təzə limon, portağal və ya naringi qabığı da qoymaq olar. Sitrus meyvələrinin xoş ətri pis qoxunu maskalayır.
Bundan başqa, mütəxəssislər ayaqqabının dondurulması üsulunu da tövsiyə edirlər. Ayaqqabı tam quruduqdan sonra onu hava keçirməyən plastik torbaya qoyaraq 5–6 saat dondurucuda saxlamaq bakteriyaların sayını azaltmağa kömək edir.
Ayaqqabı dondurucudan çıxarıldıqdan sonra yenidən tam qurudulmalıdır. Lakin bu üsul dəri ayaqqabılar üçün uyğun hesab edilmir, çünki temperaturun kəskin dəyişməsi materiala zərər verə bilər.
Mütəxəssislər qeyd edirlər ki, bu sadə üsullar ayaqqabıdakı xoşagəlməz qoxunu azaltmaqla yanaşı, onun daha uzun müddət təmiz və təravətli qalmasına da kömək edir.
Jalə Demokrat.az
