Son dövrlər sosial şəbəkələrdə geniş müzakirə olunan matça çayının dəmirin orqanizm tərəfindən mənimsənilməsini azaltdığı ilə bağlı iddialar mütəxəssislər tərəfindən qiymətləndirilib.
Demokrat.az xəbər verir ki, onların sözlərinə görə, gündə bir fincan matça əksər insanlar üçün ciddi risk yaratmasa da, veqanlar və dəmir çatışmazlığı olan şəxslər ehtiyatlı olmalıdırlar.
Tarixinin eramızdan əvvəl təxminən 2700-cü illərə qədər uzandığı hesab edilən matça kölgədə yetişdirilən yaşıl çay yarpaqlarının üyüdülməsi ilə hazırlanır. Son illərdə bu içki, xüsusilə yay mövsümündə, geniş populyarlıq qazanıb. Onunla bağlı narahatlıqlar əsasən dəmir mübadiləsinə mümkün təsiri ilə əlaqələndirilir.
Adi yaşıl çaydan fərqli olaraq, matça hazırlanarkən yarpaqlar bütöv şəkildə istifadə olunduğundan daha çox qida maddəsi və antioksidant qəbul edilir. Dietoloq Ludlam-Raine bildirib ki, matça həqiqətən də dəmirin sorulmasını müəyyən dərəcədə azalda bilər.
Bunun əsas səbəbi çayın tərkibində yüksək miqdarda olan taninlərdir. Taninlər ispanaq, lobya və mərcimək kimi bitki mənşəli məhsullarda olan "heme olmayan dəmirlə" birləşərək orqanizmin mənimsəyə bilmədiyi birləşmələr əmələ gətirir. Yarpaqlar bütöv şəkildə istifadə edildiyi üçün matçanın tanin tərkibi adi yaşıl çay və ya qəhvə ilə müqayisədə daha yüksək ola bilər və bu da dəmirin sorulmasına daha güclü təsir göstərə bilər.
Taninlər yalnız matçada deyil, qəhvə, qırmızı şərab və tünd şokoladda da mövcuddur. Bu maddələr bağırsaqlarda dəmirə bağlanaraq onun mənimsənilməsini çətinləşdirə bilər.
Bununla belə, Ludlam-Raine vurğulayıb ki, gündə bir fincan "matcha" içmək əksər sağlam insanlar üçün ciddi problem yaratmır. Digər mütəxəssis Sonal Jenkins isə qeyd edib ki, balanslı qidalanan insanların gündəlik dəmir qəbulu adətən bu təsiri kompensasiya etməyə kifayət edir.
Ekspertlər xüsusilə iki qrupun diqqətli olmasını tövsiyə edirlər. Bunlar əsasən bitki mənşəli dəmir mənbələri ilə qidalanan vegan və vegetarianlar, eləcə də qan analizləri ilə anemiya diaqnozu qoyulmuş və ya dəmir çatışmazlığı olan şəxslərdir. Bu kateqoriyadan olan insanlara matçanı həddindən artıq istehlak etməmək və onu dəmirlə zəngin qidalarla eyni vaxtda qəbul etməmək tövsiyə olunur.
Jalə Demokrat.az
