Havanın temperaturu 30 dərəcəni keçdikdə iştaha azalır, yemək hazırlamaq isə daha çətin olur. Mütəxəssislər bildirirlər ki, isti günlərdə yalnız su içmək kifayət etmir, qidalanma rejimi də hava şəraitinə uyğunlaşdırılmalıdır.
Demokrat.az xəbər verir ki, onların sözlərinə görə, bir neçə sadə dəyişikliyin tətbiqi susuzlaşmanın qarşısını almağa və isti havanı daha rahat keçirməyə kömək edə bilər.
İsti havalarda iştaha azalır
Boğucu istilər təkcə gündəlik həyata deyil, həm də qidalanma vərdişlərinə birbaşa təsir göstərir.
Bir çox insan isti havalarda ağır yeməklərdən uzaq dursa da, bu zaman kifayət qədər maye və qida qəbul etməmək riski yaranır.
Mütəxəssislər hesab edirlər ki, tamamilə fərqli qidalanma rejiminə keçməyə ehtiyac yoxdur. Sadəcə bəzi vərdişlərin dəyişdirilməsi sağlamlıq baxımından daha faydalıdır.
1. Daha çox zülal qəbul etməyə ehtiyac yoxdur
"Oxford Brookes University"nin qidalanma üzrə mütəxəssisi doktor Eyslinq Deyli bildirib ki, isti havalarda orqanizmin əlavə zülala ehtiyacı olmur.
Ət, toyuq və balıq kimi məhsulların hazırlanması mətbəxdə temperaturu daha da artırdığı üçün "air fryer" və ya aşağı temperaturda bişirən cihazlardan istifadə etmək tövsiyə olunur.
Alternativ olaraq mərcimək, lobya, qatıq, pendir, tofu və çərəzlər də yaxşı zülal mənbələri hesab edilir.
Mütəxəssislərin fikrincə, smuzi, qatıq, lobya salatı, yumurta və ton balığı kimi yüngül yeməklər həm zülal ehtiyacını ödəyir, həm də həzmi asanlaşdırır.
2. Suyu təkcə içməyin, qidalar vasitəsilə də qəbul edin
İsti havalarda tərləmə nəticəsində orqanizm daha çox maye itirir. Buna görə də yalnız su içmək deyil, su tərkibi yüksək olan qidaların qəbul edilməsi də vacibdir.
Qidalanma mütəxəssisləri xiyar, pomidor, kahı, kərəviz, qarpız və çiyələyin yay aylarında mütləq rasiona daxil edilməsini tövsiyə edirlər. Bu məhsulların tərkibində 90 faizdən çox su var.
Alma, armud, üzüm, portağal, ananas və yerkökü də yüksək su tərkibi sayəsində orqanizmin maye balansını dəstəkləyir.
Mütəxəssislər kifayət qədər su qəbul olunub-olunmadığını müəyyən etməyin ən sadə üsullarından birinin sidiyin rəngini izləmək olduğunu bildirirlər. Açıq sarı rəng normal hesab olunur, tünd sarı, narıncı və ya qəhvəyi rəng isə susuzlaşmanın əlaməti ola bilər.
3. İsti çay düşündüyünüz qədər zərərli deyil
Bir çox insan isti havalarda yalnız soyuq içkilərə üstünlük versə də, mütəxəssislərin fikrincə, isti və ya ilıq içkilər də bədənin sərinlənməsinə kömək edə bilər.
Araşdırmalar göstərir ki, isti içki qəbul edildikdə orqanizm daha çox tərləyir və bunun sayəsində istiliyi xaric edir.
Bununla yanaşı, mütəxəssislər vurğulayırlar ki, əsas amil içkinin temperaturu deyil, gün ərzində kifayət qədər maye qəbul edilməsidir.
Onlar həmçinin həddindən artıq qəhvə və alkoqol istehlakının orqanizmdə maye itkisini artırdığını bildirirlər. Gündə bir və ya iki fincan qəhvə əksər insanlar üçün problem yaratmasa da, yüksək miqdarda kofein susuzlaşma riskini artıra bilər.
Yemək saatlarını dəyişmək də faydalıdır
Mütəxəssislər isti günlərdə səhər yeməyini daha erkən yeməyi, günün ən isti saatlarında ağır qidalardan uzaq durmağı və axşam havanın sərinləşdiyi vaxtlarda şam etməyi tövsiyə edirlər.
Onların sözlərinə görə, kifayət qədər maye qəbulu, su tərkibi yüksək olan meyvə və tərəvəzlər, eləcə də yüngül yeməklər yay istilərini daha rahat keçirməyin ən effektiv yollarından hesab olunur.
