Yay mövsümündə meyvə və giləmeyvə ilə hazırlanan piroqlar ən sevilən ev şirniyyatlarından biridir.
Demokrat.az xəbər verir ki, qısa xəmir və xama içliyi ilə hazırlanan qara qarağat piroqu yüngül turşməzə dadı, zərif teksturası və sadə hazırlanma üsulu ilə seçilir.
Qara qarağat piroqu üçün asan resept
Bu resept hətta çörəkbişirmə təcrübəsi az olanlar üçün də uyğundur. Piroq qısa müddətdə hazırlanır, xəmiri xırtıldayan, içliyi isə yumşaq və zərif alınır.
Xəmir üçün lazım olan ərzaqlar
* 160 qram un * 80 qram kərə yağı * 50 qram şəkər * 1 çimdik duz * ½ çay qaşığı qabartma tozu * 1 çay qaşığı xama * 1 yumurta
İçlik üçün
* 200 qram xama * 100 qram şəkər * 100 qram qara qarağat * 1 paket vanilli şəkər * 1 xörək qaşığı nişasta * 1 yumurta
Hazırlanma qaydası
Dərin qabda unu, qabartma tozunu, şəkəri, duzu və kərə yağını qarışdıraraq ovuntu halına gətirin. Üzərinə yumurta və xamanı əlavə edib yumşaq xəmir yoğurun.
Xəmiri soba qəlibinə yayın, kənarlarını qaldıraraq forma verin və 20 dəqiqə dondurucuda saxlayın.
Bu vaxt içliyi hazırlayın. Xamanın üzərinə yumurtanı, şəkəri, vanilli şəkəri və nişastanı əlavə edib çəngəl və ya çırpıcı ilə hamar kütlə alınana qədər qarışdırın.
Qəlibi dondurucudan çıxarın, içliyi xəmirin üzərinə tökün və qara qarağat gilələrini bərabər şəkildə səpin.
Piroqu əvvəlcədən 180 dərəcəyədək qızdırılmış sobada təxminən 40 dəqiqə bişirin. Hazır olduqdan sonra sobanın içində soyumağa qoyun. Daha sonra porsiyalara bölərək süfrəyə təqdim edin.
