Günəbaxan tumu E vitamininin ən yaxşı mənbələrindən biri hesab olunsa da, bu vitaminin daha yüksək miqdarda olduğu digər məhsullar da mövcuddur. Diyetoloqlar orqanizmin bu vacib antioksidanta olan tələbatını qarşılamağa kömək edən məhsulları açıqlayıblar.
Demokrat.az xəbər verir ki, "Health" nəşrinin məlumatına görə, E vitamini hüceyrələri sərbəst radikalların və ətraf mühit amillərinin yaratdığı zədələrdən qoruyur, eyni zamanda ürək-damar və immun sisteminin sağlamlığını dəstəkləyir.
Müqayisə üçün qeyd olunur ki, təxminən 28 qram günəbaxan tumunda 7,4 mq E vitamini var. Bu, tövsiyə olunan gündəlik normanın təxminən yarısını təşkil edir. Lakin bəzi bitki yağlarında bu vitamin daha yüksək konsentrasiyada olur.
E vitamini ilə zəngin 5 məhsul
1. Buğda rüşeymi yağı
Siyahının ilk sırasında buğda rüşeymi yağı yer alır. Bu yağın cəmi bir xörək qaşığında 20,3 mq E vitamini var ki, bu da gündəlik normanın 134 faizinə bərabərdir. Mütəxəssislər E vitamininin yüksək temperaturda parçalandığını nəzərə alaraq, bu yağı salatlara, sıyıqlara, yoqurta və ya smuzilərə bişirildikdən sonra əlavə etməyi tövsiyə edirlər.
2. Fındıq yağı
İkinci yerdə fındıq yağı qərarlaşıb. Bir xörək qaşığında təxminən 6,4 mq E vitamini mövcuddur ki, bu da gündəlik normanın 42 faizindən çoxdur. Araşdırmalar göstərir ki, fındığın özü də antioksidantlarla zəngin olduğundan hüceyrələrin müdafiə mexanizmlərinin güclənməsinə kömək edir.
3. Günəbaxan yağı
Üçüncü yerdə günəbaxan yağı qərarlaşıb. Bir xörək qaşığı bu yağ orqanizmi 5,5 mq E vitamini ilə təmin edir ki, bu da gündəlik tələbatın 36 faizindən çoxunu qarşılayır. Xüsusilə yüksək oleinli növlər ürək-damar xəstəlikləri riskinin azalması ilə əlaqələndirilir.
4. Badam yağı
Siyahıda növbəti yeri badam yağı tutur. Onun bir xörək qaşığında təxminən 5,3 mq E vitamini var. Araşdırmalara əsasən, bu məhsul qanda xolesterinin səviyyəsinə müsbət təsir göstərə və yaşlı insanlarda həzmin normallaşmasına kömək edə bilər.
5. Pambıq yağı
İlk beşliyi pambıq yağı tamamlayır. Bir xörək qaşığında təxminən 4,8 mq E vitamini mövcuddur ki, bu da gündəlik normanın 32 faizinə uyğundur. Yüksək tüstülənmə temperaturuna görə bu yağ qızartma, bişirmə və müxtəlif sousların hazırlanması üçün əlverişlidir.
Mütəxəssislər bildirirlər ki, bir çox bitki yağı faydalı maddələrini yalnız minimal istilik emalı zamanı qoruyub saxlayır. Buna görə də buğda rüşeymi, fındıq və badam yağlarını hazır yeməklərə əlavə etmək və ya soyuq qəlyanaltılarda istifadə etmək daha məqsədəuyğundur.
