Alimlər açıq havada minimum nə qədər vaxt keçirməyin sağlamlığa fayda verdiyini araşdırıblar və əldə olunan nəticələr maraq doğurub.
Demokrat.az xəbər verir ki, "Silicon Canals" nəşrinin yazdığına görə, 2010-cu ildə iki alim Böyük Britaniyada aparılmış və ümumilikdə 1252 nəfəri əhatə edən 10 ayrı tədqiqatın nəticələrini birləşdirib. Araşdırma göstərib ki, təbiətdə cəmi beş dəqiqə fiziki aktivlik belə əhval-ruhiyyənin və özünəinamın yaxşılaşması ilə əlaqələndirilir.
Tədqiqatların nəticələrinə əsasən, müşahidə olunan yaxşılaşma statistik baxımdan etibarlı olub. Ayrı-ayrı araşdırmaların səkkizində iştirakçıların özünəinamında, yeddidə isə əhval-ruhiyyəsində müsbət dəyişiklik qeydə alınıb.
Maraqlıdır ki, özünəinamdakı ən böyük artım məhz ən qısa – beş dəqiqəlik təbiət gəzintisindən sonra müşahidə edilib. Daha uzun müddətli gəzintilər də müsbət təsir göstərsə də, əlavə faydanın nisbətən məhdud olduğu bildirilib.
Bu nəticələr sonrakı araşdırmalarla da dəstəklənib. 2025-ci ildə 980 nəfərin iştirak etdiyi 15 randomizə olunmuş nəzarətli tədqiqatı əhatə edən sistematik icmal göstərib ki, təbiətdə həyata keçirilən fiziki fəaliyyət psixi sağlamlığa orta dərəcədə müsbət təsir göstərir. Xüsusilə 20 dəqiqədən az davam edən proqramlarda daha yaxşı nəticələr müşahidə olunub.
Su hövzələrinin yaxınlığında təsir bir qədər yüksək olub
Araşdırmaya görə, çay, göl və ya dəniz kimi su hövzələrinin yaxınlığında keçirilən vaxt əhval-ruhiyyə və özünəinam baxımından bir qədər daha yaxşı nəticə verib. Lakin alimlər bildirirlər ki, bu fərq böyük deyil və ümumi nəticə ondan ibarətdir ki, istənilən təbii mühitdə vaxt keçirmək faydalı ola bilər.
Bundan başqa, özünəinamdakı ən böyük müsbət dəyişikliklər ən gənc iştirakçılarda və əvvəllər psixi sağlamlıq problemləri yaşamış şəxslərdə müşahidə olunub.
Bununla yanaşı, tədqiqat müəllifləri qeyd edirlər ki, mövcud məlumatlar açıq havada edilən fiziki fəaliyyətin eyni məşqlərin qapalı məkanda yerinə yetirilməsindən daha faydalı olduğunu qəti şəkildə sübut etmir. Onların fikrincə, müsbət təsirin müəyyən hissəsi sadəcə fiziki aktivliyin özü ilə bağlı ola bilər.
Bundan əvvəl alimlər gündəlik 30 dəqiqə yeriməyin orqanizmdə yaratdığı dəyişiklikləri də araşdırıblar.
