Yüksək qan təzyiqi olan insanlar axşam vərdişlərinə diqqət yetirməlidirlər. Saat 17:00-dan sonra bəzi hərəkətlər sağlamlığa mənfi təsir göstərə bilər.
Demokrat.az xəbər verir ki, bu barədə "EatingWell" yazıb.
Yüksək qan təzyiqi yalnız yaş və irsiyyətlə deyil, həm də həyat tərzi ilə bağlıdır. Qidalanma, fiziki aktivlik və stressə nəzarət qan təzyiqinin göstəricilərinə təsir edə bilər.
Axşam saatlarında bir çox insan sağlam rejimə riayət etməkdə çətinlik çəkir. İş günündən sonra istirahət etmək istəyi səbəbindən qidalanmaya və digər faydalı vərdişlərə nəzarət çox vaxt ikinci plana keçir.
Bəzi axşam hərəkətləri günün bu vaxtında tədricən aşağı düşməli olan qan təzyiqinin normallaşmasına mane ola bilər.
Yüksək qan təzyiqi olan insanların saat 17:00-dan sonra uzaq durması tövsiyə olunan 5 şey:
1. Alkoqol
Alkoqol axşam saatlarında rahatlama üsulu kimi görünsə də, qan təzyiqinə təsir göstərə bilər. Müasir kardioloq tövsiyələrinə əsasən, qidalanmada alkoqol nə qədər az olarsa, ürək və damar sağlamlığı üçün bir o qədər yaxşıdır.
Bu təsir pivə, şərab və daha güclü içkilərə də aiddir. Araşdırmalar göstərir ki, hətta nisbətən az miqdarda alkoqol qəbulu belə qan təzyiqində dəyişikliklərə səbəb ola bilər.
2. Bəzi reseptsiz dərmanlar
İbuprofen və naproksen ağrını azaltmağa kömək edən qeyri-steroid iltihabəleyhinə dərmanlardır, lakin Amerika Ürək Assosiasiyasının məlumatına görə, bəzi insanlarda qan təzyiqinin yüksəlməsinə səbəb ola bilər.
Bundan əlavə, burun tutulması zamanı istifadə olunan burun açıcı preparatlar da oxşar təsir göstərə bilər. Hipertoniyanız varsa və reseptsiz dərmanlardan tez-tez istifadə edirsinizsə, daha təhlükəsiz alternativləri həkimlə müzakirə etmək məsləhətdir.
3. Duz miqdarı yüksək olan yeməklər
Axşam yeməyi gün ərzində ən çox natrium qəbul edilən qida qəbulu ola bilər. Bunun səbəbi axşam porsiyaların daha böyük olması və insanların daha çox restoran və ya çatdırılma xidmətlərindən istifadə etməsidir.
Yüksək qan təzyiqi olan insanlara daha çox evdə yemək hazırlamaq və minimum emal olunmuş məhsullardan hazırlanmış sadə qidalara üstünlük vermək tövsiyə olunur. Çox duz əvəzinə göyərti və ədviyyatlardan istifadə etmək olar.
4. Ekran qarşısında həddindən artıq vaxt keçirmək
Televizora uzun müddət baxmaq, smartfon və digər cihazlardan çox istifadə ürək sağlamlığının pisləşməsi, o cümlədən yüksək qan təzyiqi ilə əlaqələndirilir.
Bunun səbəblərindən biri fiziki aktivliyin azalması, digəri isə emosional məzmun səbəbindən yaranan stress ola bilər. Bundan əlavə, ekran qarşısında keçirilən vaxt yuxunun müddətini azalda bilər və yuxu çatışmazlığı qan təzyiqinə təsir edir.
5. Şirin qəlyanaltılar
Axşam saatlarında müntəzəm olaraq şirin qidalar qəbul etmək qanda qlükoza səviyyəsinə və insulin fəaliyyətinə təsir göstərə bilər. Vaxt keçdikcə bu dəyişikliklər dolayı yolla qan təzyiqinin nəzarətinə də təsir edə bilər.
Şirin yemək istəyi olduqda, ekspertlər onu yatmazdan əvvəl deyil, günün daha erkən saatlarında qəbul etməyi məsləhət görürlər. Məsələn, kiçik porsiya peçenyeni nahardan sonrakı vaxta saxlamaq daha məqsədəuyğundur.
Jalə Demokrat.az
