Qəbizlik probleminin idarə olunması ilə bağlı mütəxəssislər tərəfindən yeni qidalanma tövsiyələri hazırlanıb. Dietoloqlar və qastroenteroloqlar bildirirlər ki, düzgün qidalanma bağırsaq fəaliyyətinin yaxşılaşmasına və xroniki qəbizliyin azalmasına kömək edə bilər.
Yeni qidalanma bələdçisi böyüklərdə xroniki qəbizliyə müxtəlif qidaların və qida əlavələrinin təsirini araşdıran 75 elmi tədqiqatın nəticələri əsasında hazırlanıb.
Araşdırmalara əsasən, qəbizliyə qarşı faydalı ola biləcək qidalar və əlavələr arasında kivi, quru gavalı, çovdar çörəyi, psyllium qabığı, maqnezium əlavələri və bəzi probiyotiklər yer alır. Mütəxəssislər bildirirlər ki, kivi tərkibindəki lif sayəsində bağırsaq hərəkətlərini yaxşılaşdıra bilər. Xüsusilə yaşıl kivinin həm həll olunan, həm də həll olunmayan liflərlə zəngin olduğu və nəcisin yumşalmasına kömək etdiyi qeyd olunur.
Quru gavalının isə tərkibindəki lif və sorbitol sayəsində bağırsaq fəaliyyətini tənzimlədiyi bildirilir. Tövsiyələrə görə, gündə 8–10 ədəd quru gavalı qəbul etmək faydalı ola bilər, lakin ilk dəfə istifadə edənlərin daha az miqdardan başlaması məsləhət görülür.
Araşdırmalarda çovdar çörəyinin ağ çörəklə müqayisədə bağırsaq hərəkətlərini artırdığı müəyyən edilib. Bunun səbəbi kimi çovdar çörəyinin daha yüksək lif tərkibinə malik olması göstərilir.
Mütəxəssislər həmçinin psyllium qabığının qəbizlik zamanı təsirli lif mənbəyi ola biləcəyini bildirirlər. Onun qəbuluna az miqdardan başlayaraq tədricən artırılması tövsiyə olunur.
Maqnezium əlavələrinin bəzi formalarının da bağırsağa su çəkərək nəcisin yumşalmasına və bağırsaq hərəkətlərinin stimullaşmasına kömək edə biləcəyi qeyd edilir.
Yeni tövsiyələrdə probiyotiklərə də yer verilib. Xüsusilə Bifidobacterium lactis tərkibli probiyotiklərin bəzi insanlarda qəbizlik əlamətlərini azaltmağa kömək edə biləcəyi bildirilib. Probiyotiklərlə zəngin kefirin də faydalı ola biləcəyi qeyd olunur.
Mütəxəssislər qəbizliyin qarşısını almaq üçün kifayət qədər maye qəbul etməyin vacibliyini vurğulayırlar. Lifli qidaların qəbulunun isə birdən-birə artırılmaması tövsiyə olunur, çünki bu, köp və qarında narahatlıq yarada bilər.
Bildirilib ki, bu tövsiyələr əsasən hamiləlik, dərman istifadəsi və ya digər xüsusi səbəblərlə bağlı olmayan xroniki qəbizlik yaşayan böyüklər üçün nəzərdə tutulub.
Leyla Demokrat.az
