Dünyada qadınlarda sonsuzluq hallarının yaxın illərdə əhəmiyyətli dərəcədə artacağı proqnozlaşdırılır. Yeni araşdırmaya görə, xüsusilə 35 yaşdan yuxarı qadınlarda doğuş qabiliyyəti ilə bağlı problemlərin sayı 2036-cı ilə qədər təxminən 80 milyona çata bilər.
Demokrat.az xəbər verir ki, "The Lancet" jurnalında dərc olunan tədqiqatda qadınlarda sonsuzluq problemlərinin əsasən 35-49 yaş qrupunda sürətlə artdığı qeyd olunur. Araşdırmaçılar bildiriblər ki, 2023-cü ildə dünyada təxminən 53,6 milyon olan sonsuzluq hallarının 10 il ərzində 80 milyona yüksələcəyi gözlənilir.
Tədqiqata əsasən, ən böyük artım 35-39 yaş aralığındakı qadınlarda müşahidə olunacaq. Mütəxəssislər bunun əsas səbəbləri sırasında qadınların daha gec yaşda ana olmaq qərarı verməsini, yaş artdıqca yumurtalıq ehtiyatının azalmasını və yumurtaların mayalanma qabiliyyətinin zəifləməsini göstərirlər.
Araşdırma 1990-2023-cü illər üzrə *Qlobal Xəstəlik Yükü (GBD)* məlumatları əsasında aparılıb. Çinli alimlərin hazırladığı tədqiqat 204 ölkə və regionda sonsuzluq göstəricilərini əhatə edib.
Sonsuzluq hallarının artmasına nə səbəb olur?
Ekspertlərin fikrincə, artım yalnız bioloji amillərlə bağlı deyil. İnsanların daha gec ailə qurması, uşaq sahibi olmaq planlarını təxirə salması, iqtisadi çətinliklər və sosial dəyişikliklər də bu prosesə təsir edir.
Xüsusilə inkişaf etmiş ölkələrdə qadınların təhsil və karyera müddətinin uzanması ana olma yaşının yüksəlməsinə səbəb olur. Eyni zamanda, sonsuzluqla bağlı məlumatlılığın artması daha çox insanın tibbi yardıma müraciət etməsinə gətirib çıxarır.
Mütəxəssislər bildirirlər ki, gec yaşda hamiləlik planlaşdırılması hamilə qalma ehtimalını azalda, düşük riskini artıra və süni mayalanma kimi köməkçi reproduktiv üsulların uğur şansını aşağı sala bilər.
Reproduktiv sağlamlıq üzrə mütəxəssis *Rocio Nunez Calonge* qeyd edib ki, problemin həlli yalnız süni mayalanma texnologiyalarının inkişafı ilə məhdudlaşmamalıdır. Onun sözlərinə görə, qadınların ana olmağı gecikdirməsinə səbəb olan sosial və iqtisadi amillər də nəzərə alınmalıdır.
Ekspertlər vurğulayırlar ki, sonsuzluq yalnız qadınlara aid problem deyil. Dünya üzrə insanların təxminən hər altı nəfərindən birinin həyatının müəyyən dövründə bu problemlə üzləşə biləcəyi, reproduktiv yaşda olan cütlüklərin isə 8-12 faizinin sonsuzluqdan təsirləndiyi ehtimal olunur.
Jalə Demokrat.az
