Antioksidantlar bir çox qida məhsulunda olsa da, onlar daha çox tərəvəz, meyvə və paxlalılarla əlaqələndirilir.
Demokrat.az xəbər verir ki, bu barədə "Verywell Health" yazır.
Nəşrin məlumatına görə, antioksidantlar hüceyrələrə zərər verə və xroniki xəstəliklərin inkişafına səbəb ola bilən sərbəst radikalları neytrallaşdırır.
Qidadan kifayət qədər antioksidant qəbul etmək üçün rasionun müxtəlif olması vacibdir. Müxtəlif məhsullar fərqli növ antioksidantlar ehtiva edir və orqanizmə müxtəlif yollarla təsir göstərir.
Bəzi məhsullarda antioksidantların miqdarı daha yüksək olsa da, yalnız onlarla qidalanmaq düzgün deyil. Çünki bu, zamanla qidalanmanın monoton və balanssız olmasına səbəb ola bilər.
Təbii antioksidantlarla zəngin olan 6 məhsul
1. Giləmeyvələr
ABŞ Kənd Təsərrüfatı Nazirliyinin Kənd Təsərrüfatı Tədqiqatları Xidmətinin məlumatına görə, qaragilə, moruq, çiyələk və böyürtkən antioksidant baxımından ən zəngin meyvələr sırasındadır.
Bu meyvələrin tərkibində antioksidant xüsusiyyətə malik A, C və E vitaminləri var. Bundan əlavə, onlar güclü təbii antioksidant hesab olunan antosianlarla zəngindir.
2. Lobya
Lobya da antioksidantlarla zəngin məhsullar sırasına daxildir.
Onun tərkibində fenol turşuları, flavonoidlər və antosianlar mövcuddur. Bu birləşmələr paxlalıların antioksidant xüsusiyyətlərini təmin edir.
3. Alma
Alma flavonoidlərin yüksək miqdarı ilə seçilir.
Bitki mənşəli bu fitonutrientlər orqanizmdə antioksidant kimi fəaliyyət göstərir və iltihabəleyhinə xüsusiyyətlərə malikdir.
Araşdırmalar göstərir ki, alma həmçinin fenol birləşmələri ilə zəngindir. Bu maddələr əsasən meyvənin qabığında və lətində toplanır. Müxtəlif alma növlərində onların miqdarı fərqli ola bilər.
4. Çərəzlər
Çərəzlərin tərkibində antioksidant xüsusiyyətə malik polifenollar, xüsusilə də katexinlər olur.
Araşdırmalara görə, qoz və pekan qozunda polifenolların ümumi miqdarı daha yüksəkdir. Bununla yanaşı, badam, fındıq, püstə, keşyu və yerfındığında da bu faydalı birləşmələr mövcuddur.
5. Tünd şokolad
Araşdırmalara əsasən, tünd şokolad yüksək antioksidant tərkibi ilə seçilir.
Onun əsas komponenti olan kakao katexinlər, flavonoidlər və digər fenol birləşmələri ilə zəngindir. Məhz bu maddələr tünd şokoladın antioksidant xüsusiyyətlərini təmin edir.
6. Tünd yaşıl yarpaqlı tərəvəzlər
İspanaq, keyl, yarpaq kələmi, manqold, su kressi, bok-çoy və yarpaq xardalı antioksidant qəbulunu artırmaq istəyənlər üçün yaxşı seçim hesab olunur.
Bu tərəvəzlər A, C və E vitaminləri, həmçinin karotinoidlərlə zəngindir. Onların yüksək antioksidant potensialı da məhz bu maddələrlə əlaqələndirilir.
Antioksidantlarla zəngin digər məhsullar
Antioksidant baxımından zəngin digər məhsullar arasında mərcangilə, artişok, qara gavalı, şirin albalı, "Russet" sort kartof və gavalı da yer alır.
Antioksidantlar müxtəlif içkilərdə də mövcuddur. Bunlara yaşıl çay, qara çay, rooibos çayı, alma, mərcangilə, pomidor, nar, çəhrayı qreypfrut, eləcə də qaragilə və moruq şirələri daxildir. Bundan başqa, qırmızı və ağ şərab, sidr, həmçinin süd əlavə olunmamış qəhvə də antioksidant mənbəyi hesab olunur.
Jalə Demokrat.az
