Milli Məclisin plenar iclasında “Qaçqınların və məcburi köçkünlərin statusu haqqında” Qanuna təklif edilən dəyişikliklər üçüncü oxunuşda təsdiqlənib. Yeni qaydalara görə, azad edilən yurdlarına köçən, mənzillə təmin olunan və ya təklif edilən evdən imtina edən şəxslərin məcburi köçkün statusu götürülür.
Deputat Vüqar Bayramov məsələ ilə bağlı mühüm məqamları açıqlayıb. Deputat bildirib ki, statusu ləğv edilən şəxslər daha üç il sosial müdafiə tədbirlərindən yararlana biləcəklər.
Hazırda keçmiş köçkünlər üçün qüvvədə olan bütün imtiyazlar mənzil aldıqdan sonra da qüvvədə qalır. Bura hər ailə üzvünə görə verilən aylıq 60 manatlıq müavinət də daxildir. Həmçinin rəsmi rüsumlar üzrə güzəştlər də qorunub saxlanılır.
Övladları ödənişli ali təhsil alan ailələr üçün də xüsusi güzəştlər davam edir. Tələbə qəbul zamanı bu hüquqa sahibdirsə, təhsilhaqqı bütün universitet illəri boyu dövlət tərəfindən ödənilir. Üç illik müddət bu güzəştin dayandırılmasına səbəb olmur.
Yeni qanun layihəsi dövlətin öz vətəndaşlarına olan davamlı diqqətini göstərir. Bu addım doğma torpaqlarına qayıdan ailələrin yeni şəraitə uyğunlaşmasına ciddi dəstək rəmzidir.
Beləliklə, məcburi köçkünlər mənzillə təmin edildikdən sonra da üç il ərzində dövlət qayğısı ilə əhatə olunurlar.
Demokrat.az
