Psixoloqlar yemək zamanı ən sevilən hissəni sona saxlama vərdişinin sadəcə təsadüfi bir davranış olmadığını bildirirlər. Mütəxəssislərə görə bu adət beynin “mükafatlandırma”, “gözləmə” və “həzzin idarə olunması” mexanizmləri ilə əlaqədardır.
Demokat.az xəbər verir ki, araşdırmalara əsasən, insanlar daha çox zövq aldıqları yeməyi sona saxlayaraq “təxirə salınmış həzz” (delayed gratification) prinsipini tətbiq edirlər. Bu, insanın gələcəkdə daha böyük zövq alacağını bildiyi halda ani həzzləri gecikdirmə qabiliyyəti kimi izah olunur.
Mütəxəssislər qeyd edirlər ki, ən sevimli loxmanın sona saxlanılması həm də ümumi yemək təcrübəsinə təsir edir. Sonda gözlənilən “mükafat” hissi, daha az sevilən qidaların da daha rahat qəbul edilməsinə səbəb olur.
Psixoloqların fikrincə, bu davranışın formalaşmasında uşaqlıq tərbiyəsi də mühüm rol oynayır. “Əvvəl tərəvəzini ye, sonra şirniyyatı” kimi vərdişlər zamanla avtomatik davranışa çevrilir.
Mütəxəssislər bu vərdişin ümumilikdə zərərsiz olduğunu, hətta yeməkdən alınan zövqü artırdığını bildirirlər.
Leyla Demokrat.az
