Azərbaycanda yay istilərinin düşməsi ilə ağcaqanad problemi yenidən aktivləşib. Xüsusilə Bakı eyvanlarında və bölgələrdə hamını eyni sual düşündürür. Niyə bəzi insanları həşəratlar daha çox sancır?
Alimlər bu mövzuda maraqlı araşdırma aparıblar. Məlum olub ki, ağcaqanadlar qurbanlarını təsadüfən seçmirlər.
Tədqiqatlar göstərir ki, sıfır qan qruplu şəxslər daha çox hədəfə çevrilirlər. Onların dərisinə həşəratların qonma ehtimalı olduqca yüksəkdir. Ən az zərər çəkənlər isə məhz A qan qrupunun daşıyıcılarıdır.
Lakin tək səbəb damarlarda axan qan deyil. İnsanların nəfəs alarkən xaric etdiyi karbon qazı da önəm daşıyır. Sürətlə nəfəs alanlar və idman edənlər həşəratları özünə cəlb edir. Həmçinin bədən temperaturu yüksək olanlar da tez-tez sancılır. Tərlə birlikdə ifraz olunan maddələr ağcaqanadlar üçün xüsusi siqnaldır.
Geyimlərin rəngi də bu prosesdə böyük rol oynayır. Qara və tünd göy rənglər həşəratların diqqətini dərhal çəkir. İsti yay günlərində qorunmaq üçün həyətlərdə durğun su saxlanılmamalıdır. Axşam saatlarında açıq rəngli və boş geyimlərdən istifadə edilməlidir. Lavanda və ya limon otu qoxuları da köməyə çatır.
Qısası, ağcaqanadların hücumu həm qan qrupundan, həm də bədənin qoxusundan asılıdır.
İsmayıl Demokrat.az
