D vitamini və Omeqa-3 sümük, ürək, beyin və immun sisteminin sağlamlığını dəstəkləyən mühüm maddələrdir. Hər iki əlavənin iltihabəleyhinə təsiri var və birlikdə qəbul edildikdə bəzi sağlamlıq göstəricilərini yaxşılaşdıra bilər.
Ağrılar azala bilər
Araşdırmalar göstərir ki, D vitamini və Omeqa-3 birlikdə qəbul edildikdə iltihabı azaldaraq xroniki ağrıların idarə olunmasına kömək edə bilər. Bəzi tədqiqatlarda bu kombinasiyanın ağrını tək qəbul edilən əlavələrdən daha effektiv azaltdığı müəyyən olunub. Lakin bütün araşdırmalar eyni nəticəni göstərmir.
Yaşlanma prosesi ləngiyə bilər
Tədqiqatlara görə, Omeqa-3 bioloji yaşlanmanı yavaşlada bilər. D vitamini ilə birlikdə qəbul edilməsi bu təsiri daha da gücləndirə bilər. Bioloji yaşlanma orqan və toxumaların vəziyyətini əks etdirir və bəzi xəstəliklərin riskini proqnozlaşdırmağa kömək edir.
Əhval-ruhiyyə yaxşılaşa bilər
D vitamini və Omeqa-3 beyin fəaliyyətini dəstəkləyir, iltihabı azaldır və sinir sisteminin fəaliyyətinə müsbət təsir göstərir. Bu səbəbdən depressiya və narahatlıq əlamətlərinin azalmasına kömək edə bilər. Bununla belə, əlavələr əsas müalicəni əvəz etmir.
Yuxu keyfiyyəti arta bilər
Hər iki maddənin yuxu keyfiyyətinə müsbət təsir göstərə biləcəyi bildirilsə də, onların birlikdə qəbulunun yuxunu yaxşılaşdırdığına dair kifayət qədər elmi sübut yoxdur.
Ürək sağlamlığına fayda verə bilər
D vitamini ürək-damar xəstəlikləri riskini azaltmağa kömək edə bilər. Omeqa-3 isə triqliserid səviyyəsini aşağı salır və qan laxtalanması riskini azaldır. Birlikdə istifadənin faydaları ilə bağlı nəticələr isə müxtəlifdir.
Sümüklər möhkəmlənə bilər
D vitamini kalsiumun mənimsənilməsini artırır, Omeqa-3 isə sümük formalaşmasını dəstəkləyir. Birlikdə qəbul edildikdə osteoporoz və sınıq riskinin azalmasına kömək edə bilər.
Qan şəkəri səviyyəsi aşağı düşə bilər
Bəzi tədqiqatlar göstərir ki, D vitamini və Omeqa-3 birlikdə qəbul edildikdə qan şəkərinin tənzimlənməsinə müsbət təsir göstərə bilər.
Kimlər ehtiyatlı olmalıdır?
Aşağıdakı şəxslər bu əlavələri birlikdə qəbul etməzdən əvvəl həkimlə məsləhətləşməlidirlər:
* Balıq və ya dəniz məhsullarına güclü allergiyası olanlar; * Böyrək və ya qaraciyər xəstəliyi olanlar; * Qan durulaşdırıcı dərmanlar qəbul edənlər; * Bəzi xolesterin və sidikqovucu preparatlardan istifadə edənlər; * Hamilə və ya süd verən qadınlar.
Mütəxəssislər bildirirlər ki, D vitamini və Omeqa-3 tövsiyə olunan dozada qəbul edildikdə əksər insanlar üçün təhlükəsiz hesab olunur. Bununla belə, istifadədən əvvəl həkim məsləhəti almaq tövsiyə edilir.
Jalə Demokrat.az
